மாணவர் முரசு
இ-பேப்பர்
சிங்கப்பூரில் மூலாதார பணவீக்கம் கடந்த இரண்டு ஆண்டுகளுக்கும் மேலாக காணாதபடி ஆகஸ்ட் மாதத்தில் அதிவேகமாக கூடியது.
உணவு விலைகள் அதிகமாக இருந்ததும் வாடகை மற்றும் இதர பொருட்களின் செலவு சிறிது குறைந்ததும் அதற்கான முக்கிய காரணம்.
குடியிருப்பு, தனியார் சாலை போக்குவரத்துச் செலவுகளை நீக்கிவிட்டு மூலாதார பணவீக்கம் கணக்கிடப்படுகிறது.
ஆண்டுக்கு ஆண்டு அடிப்படையில் சென்ற மாதம் அது 1.1% அதிகரித்தது. இந்த அதிகரிப்பு ஜூலை மாதம் 1% ஆக இருந்தது.
இதனிடையே, ஒட்டுமொத்த பணவீக்கம் கொஞ்சம் குறைந்து சென்ற மாதம் 2.4% ஆக இருந்தது. இது ஜூலையில் 2.5% ஆக இருந்தது.
தனியார் போக்குவரத்து பணவீக்கத்தில் இடம்பெற்ற லேசான இறக்கம், மூலாதார பணவீக்கத்தில் ஏற்பட்ட அதிகரிப்பை ஈடுசெய்வதற்குத் தேவையான அளவைவிட கூடுதலாக இருந்ததாகவும் இதன் தாக்கம் ஒட்டுமொத்த பணவீக்கத்தில் பிரதிபலித்ததாகவும் சிங்கப்பூர் நாணய ஆணையமும் வர்த்தக தொழில் அமைச்சும் தெரிவித்தன.
தனியார் போக்குவரத்துச் செலவு ஆண்டுக்காண்டு அடிப்படையில் 10.8% கூடியது. இது ஜூலையில் 12.6% ஆக இருந்தது.
சேவைத் துறை பணவீக்கம் ஜூலையில் 1.3% ஆக இருந்தது. இது ஆகஸ்ட்டில் 1.2% ஆகக் குறைந்தது. மின்சாரம், எரிவாயுச் செலவு ஜூலையில் 9.9% கூடியது.
இந்த அதிகரிப்பு சென்ற மாதம் 9.7% ஆக இருந்தது.
குடியிருப்பு பணவீக்கம் 1.7% ஆக உயர்ந்தது. இது ஜூலையில் 1.4% ஆக இருந்தது.
உணவுத்துறை பணவீக்கமும் ஆகஸ்ட்டில் 1.5% ஆக அதிகரித்தது. இது ஜூலையில் 1.1% ஆக இருந்தது.
உலக பணவீக்கம் தொடர்ந்து கூடுதலாகவே இருந்து வந்ததை இந்த ஆணையமும் அமைச்சும் அறிக்கையில் சுட்டின.
இருந்தாலும் அந்தப் பணவீக்கம் மிதமடைவதற்கான அறிகுறிகள் தெரியவருவதாகவும் அவை குறிப்பிட்டன. மூலாதார பணவீக்கம் வரும் மாதங்களில் படிப்படியாக அதிகரிக்கும் என்று எதிர்பார்க்கப்படுகிறது.
குடியிருப்புப் பணவீக்கம் கூடும் வாய்ப்பு இருப்பதால் 2021 நான்காவது காலாண்டில் ஒட்டுமொத்த பணவீக்கத்தில் லேசான அதிகரிப்பு இருக்கும் என்றும் எதிர்பார்க்கப்படுகிறது.
இந்த ஆண்டு முழுவதும் மூலாதார பணவீக்கம் சராசரியாக 0% முதல் 1% வரைப்பட்டதாக இருக்கும் என்று அதிகாரபூர்வ கணிப்பு தெரிவிக்கிறது.
அதேபோல, ஒட்டுமொத்த பணவீக்கம் 1%க்கும் 2%க்கும் இடைப்பட்டதாக இருக்கும் என்றும் கணிக்கப்பட்டு உள்ளது.