மாணவர் முரசு
இ-பேப்பர்
மின்சாரப் பொருட்களைத் தயாரிக்கும் பேனசோனிக் நிறுவனத்தின் சிங்கப்பூர் கிளையில் சுமார் 700 ஊழியர்கள் வேலையிலிருந்து ஆட்குறைப்பு செய்யப்பட்டனர். இந்நிறுவனம், குளிர் சாதன வசதிக்கான 'கொம்ப்ரெசர்' கருவியை சிங்கப்பூரில் உற்பத்தி செய்வதை நிறுத்தவுள்ளது. இதனைத் தொடர்ந்து ஆட்குறைப்பு மேற்கொள்ளப்பட்டுள்ளது.
எனினும், உலகளவில் குளிர் சாதன வசதிக்கான 'கொம்ப்ரெசர்' கருவியின் ஆய்வு, மேம்பாட்டுப் பணிகளுக்கான அதன் தலைமையகம் தொடர்ந்து சிங்கப்பூரில் இயங்கும் என்று பேனசோனிக் ஸ்ட்ரெய்ட்ஸ் டைம்சிடம் தெரிவித்தது.
ஆசிய பசிபிக் வட்டாரத்துக்கான பேனசோனிக் நிறுவனத்தின் தலைமையகம் சிங்கப்பூரில் அமைந்துள்ளது. ஆட்குறைப்பு செய்யப்பட்டுள்ளோரின் எண்ணிக்கை, இங்கிருந்த பேனசோனிக் ஊழியர்களின் எண்ணிக்கையில் மூன்றில் ஒரு பங்கு.
உலகளவில் வர்த்தக ரீதியாகத் தான் சந்திக்கும் சவால்களைக் கருத்தில்கொண்டு குளிர்சாதன 'கொம்ப்ரெசர்' உற்பத்தியின் தொடர்பில் வர்த்தக ரீதியாக மறுபரிசீலனை செய்ததைத் தொடர்ந்து ஆட்குறைப்பு செய்ய முடிவெடுத்ததாக பேனசோனிக் கூறியது. நான்கு 45 நிமிட அமர்வுகளின் மூலம் பாதிக்கப்பட்ட ஊழியர்களுக்குத் தகவல் தெரிவித்ததாக நிறுவனம் சொன்னது. வேலையை இழந்த ஊழியர்களில் பாதிப் பேர் சிங்கப்பூரர்கள், 13 விழுக்காட்டினர் நிரந்தரவாசிகள்.