மாணவர் முரசு
இ-பேப்பர்
தெமாசெக் அறநிறுவனத்தின் இலவச முகக்கவச விநியோகம் செப்டம்டர் 26 ஞாயிற்றுக்கிழமை அன்று அதிகாரபூர்வமாக முடிவுற்றது. ஆயினும் இச்சேவையை அந்நிறுவனம் மேலும் ஒரு வாரத்துக்கு நீட்டித்துள்ளது.
மக்கள், பங்குபெறும் 15 'கேபிட்டலேண்ட்' பேரங்காடிகளிலிருந்து இலவச முகக்கவசங்களைப் பெற்றுக்கொள்ளலாம். இதுவரை 1.13 மில்லியன் குடும்பங்கள் இலவச முகக்கவசங்களைப் பெற்றுக்கொண்டுள்ளன.
பேரங்காடிகளின் தகவல் நிலையங்களுக்குச் சென்று, தங்களது 'சிங்கப்பூர் பவர்' கட்டணப் பட்டியலைக் காண்பித்து இலவச முகக்கவசங்களைப் பெற்றுக்கொள்ளலாம் என்று தெமாசெக் ஹொல்டிங்ஸ் நிறுவனத்தின் தலைமை நிர்வாகி பொறுப்பிலிருந்து வெளியேறும் திருவாட்டி ஹோ சிங் கூறினார்.
ஐந்தாம் முறையாக நடைபெறும் இவ்விநியோகச் சேவையில் குடும்பங்கள் 50 மருத்துவத்தர முகக்கவசங்களையும் 25 'என்95' ரக முகக்கவசங்களையும் பெற்றுக்கொள்ளலாம்.
எளிதில் பரவக்கூடிய டெல்டா வகை கிருமியைக் கருத்தில் கொண்டு, முதன்முறையாக மருத்துவத்தர முகக்கவங்களையும் தெமாசெக் அறநிறுவனம் வழங்குகிறது. இவற்றைத் தேர்வு செய்யப்பட்ட 'கேபிட்டலேண்ட்' பேரங்காடிகளிலிருந்தும் பேரங்காடிகளிலிருந்தும் பெற்றுக்கொள்ளலாம்.
இந்த ஒருமாதக் கால விநியோகம் ஆகஸ்ட் 26ஆம் தேதி தொடங்கியபோது, அதே நாளில் 100,000க்கும் மேற்பட்ட முகக் கவசங்கள் விநியோகிக்கப்பட்டன.
விநியோகம் தொடங்குவதற்கு ஒரு மணி நேரத்துக்கு மேல் மக்கள் சில கடைத்தொகுதிகளில் வரிசையில் காத்திருந்து அவற்றைப் பெற்றுச் சென்றனர்.
அவ்வப்போது விநியோக நிலையங்களில் முகக்கவசங்கள் தீர்ந்துபோனாலும், போதிய முகக்கவசங்கள் இருப்பதாகவும் மக்கள் மறுநாள் வந்து அவற்றைப் பெற்றுக்கொள்ளலாம் என்றும் தெமாசெக் அறநிறுவனம் கூறியுள்ளது.
130 விநியோக நிலையங்களில் தங்களுக்கு அருகில் உள்ள எந்த இடத்தில் இலவச முகக்கவசங்களைப் பெற்றுக்கொள்ளலாம் என்ற விவரத்தை மக்கள் https://stayprepared.sg/staymasked/onetime/ என்ற இணையத் தளத்தில் தெரிந்துகொள்ளலாம் என்று தெமாசெக் அறநிறுவனம் கூறியது.