மாணவர் முரசு
இ-பேப்பர்
சமையலுக்கான இடம், கிடங்குகள் உள்ளிட்ட வசதிகளுடன் 22,000 சதுர மீட்டர் பரப்பளவு கொண்ட சமையல் மையத்தை இங்குள்ள உணவு விநியோக நிறுவனம் ஒன்று தொடங்கியுள்ளது.
உணவு பானத் துறை நிறு வனங்கள் வளங்களைப் பகிர்ந்துகொள்ளவும் அவசியச் செலவுகளைக் குறைக்கவும் உதவி செய்வது அதன் நோக்கமாகும்.
பாண்டான் லூப்பில் உள்ள ஸ்பேஸ் கட்டடம், எக்ஸ்-இங்க் உணவு விநியோக நிறுவனத்தின் தலைமையகமாகவும் செயல்படுகிறது. அந்த ஆறு மாடி கட்டடம் ,சுமார் மூன்று காற்பந்துத் திடல்கள் அளவுக்குப் பரந்திருக்கிறது.
கேரட் பாப்கார்ன், தி ஐஸ் கிரீம் குக்கீ அண்ட் கோ உள்ளிட்ட சிறப்புப் பொட்டல உணவு நிறுவனங்கள் புதிய மையத்தில் வாடகைக்கு இடம் எடுத்துள்ளன.
உணவு விநியோகம், உணவு தயாரிப்பு ஆகிவற்றுடன், ஸ்பேஸ் கட்டடத்தில் புதிய உணவுவகைகளை உருவாக்கவும் சோதித்துப் பார்க்கவும் இடம் உண்டு.
இதுவரை, பாப்கார்னை வேறு கிடங்கில் வைத்துவிட்டு, அங்கிருந்து வேறு இடத்தில் உள்ள சமையல் கூடத்தில் தயாரித்துவிட்டு பின்னர் அதைக் கிளைகளுக்குக் கொண்டு சென்றது கேரட் பாப்கார்ன் நிறுவனம்.
"இப்போது கிடங்கும் சமையல் கூடமும் ஓர் இடத்தில் உள்ளன. நாங்களே அவர்களுக்காக கிளைகளில் பாப்கார்னை விநியோகித்து விடுகிறோம்," என்றார் எக்ஸ்-இங்க் நிறுவனத்தின் தலைமை நிர்வாகி நிக்கோல் இங்.