மாணவர் முரசு
இ-பேப்பர்
ஒட்டுமொத்த மறுமேம்பாட்டுத் திட்டத்தின்கீழ் 'வாட்டன் எஸ்டேட்' கொண்டோமினிய கட்டடத்தை வாங்குவதற்கான ஒப்பந்தப்புள்ளிகளைப் பெறும் உரிமையை 'யூஓஎல்' குழுமம், 'சிங்டேண்ட்' குழுமம் ஆகியவை பெற்றுள்ளன. இக்கட்டடத்தைச் சேர்ந்து வாங்க இரு அமைப்புகளும் எண்ணம் கொண்டுள்ளன. திட்டமிட்டபடி பரிவர்த்தனை இடம்பெற்றால் ஒட்டுமொத்த மறுமேம்பாட்டுத் திட்டத்தின்கீழ் இதுவே ஆக அதிக விலைக்கு விற்கப்பட்ட குடியிருப்புக் கட்டடமாக விளங்கும்.
எனினும், 'வாட்டன் எஸ்டேட்' கொண்டோமினியத்திற்கு கிடைக்கவுள்ள இந்தப் பெருமை அதிக நாட்கள் நீடிக்காமலும் போகலாம். ஒட்டுமொத்த மறுமேம்பாட்டுத் திட்டம் இவ்வாண்டு சூடுபிடித்த வண்ணம் உள்ளது. மேலும், லோரோ சுவானில் உள்ள 'சுவான் பார்க்' கொண்டோமினிய கட்டடத்தின் உரிமையாளர்கள் அதை விற்க 938 மில்லியன் வெள்ளியைக் கேட்கின்றனர்.
அதற்கான ஒப்பந்தப்புள்ளிகளைப் பெற அடுத்த மாதம் 18ஆம் தேதிக்குள் சமர்ப்பிக்கவேண்டும்.
'வாட்டன் எஸ்டேட்' கட்டடத்தின் விலை குறைந்தபட்சம் 500 மில்லியன் வெள்ளி என்று அதன் உரிமையாளர்கள் சென்ற மாதம் நிர்ணயித்தனர். இப்போது இதன் விலை அதைவிட சுமார் 10 விழுக்காடு அதிகம். நன்யாங் தொடக்கப் பள்ளி, ராஃபிள்ஸ் பெண்கள் பள்ளி ஆகியவற்றுக்கு ஒரு கிலோமீட்டருக்கும் குறைவான தூரத்தில் அமைந்துள்ளது 'வாட்டன் எஸ்டேட்'. 'கொரோனேஷன்' கடைத்தொகுதி, 'டான் கா கீ' பெருவிரைவு ரயில் நிலையம் ஆகியவற்றுக்கு மிக அருகே இருக்கும் 'வாட்டன் ரைஸ்' பகுதியில் அமைந்துள்ளது. 1983ஆம் ஆண்டு கட்டப்பட்ட இதில் இப்போது 104 வீடுகள் உள்ளன.