மாணவர் முரசு
இ-பேப்பர்
பள்ளிப்பருவத்தில் உடற்கட்டை வளர்க்கத் தவறிய இளையர் பிலேமோன், ேதசிய சேவையைத் தொடங்கியதும் உடல் உறுதியை எட்டும் இலக்கை நோக்கி செயல்பட்டார்.
நான்கு மாதங்களுக்குள் 13 கிலோகிராம் எடையைக் குறைத்து ஐபிபிடி உடற்பயிற்சி சோதனையில் தங்க விருதைப் பெற்றுள்ளார் ராணுவ நிபுணத்துவப் பயிற்சியாளரான (Specialist Cadet) பதினெட்டான் பிலேமோன், 19.
பயிற்சி முடிந்த பின்னர் ராணுவ போலிஸ் பிரிவில் சக தேசிய சேவையாளர்களை வழிநடத்தும் பொறுப்பையும் இவர் ஏற்கவிருக்கிறார்.
செயிண்ட் ஜோசப் கல்வி நிலையத்தில் அனைத்துலக பக்கலோரெட் பட்டயக் கல்வியைப் பயின்ற பிலேமோன், ஹாக்கி விளையாட்டாளராக இருந்தார். படிப்பு பற்றிய அச்சம் இவரைக் கவ்வியதும் எல்லாமும் மாறியது.
"ஐபி பட்டயத்தின் இறுதித் தேர்வு குறித்து பயம் ஏற்பட்டது. பள்ளித் தேர்வுகளில் மதிப்பெண்கள் சரியத்தொடங்கியபோது உடற்பயிற்சியைக் கைவிட்டேன். கடுமையாகப் படிக்கத் தொடங்கியதால் படிப்பில் முன்னேற்றம் ஏற்பட்டது. இறுதித் தேர்வில் 45 மதிப்பெண்களில் 36 எடுத்து சிறப்பாக செய்தேன்," என்று பிலேமோன் குறிப்பிட்டார்.
"ஆனால் உடற்பயிற்சியே என் பயத்தைப் போக்க உதவி இருக்கலாம். ஆனால் எனது பதற்றத்தைத் தணிக்க அதிவேகமான வழிகளை நாடினேன். அளவுக்கு அதிமாக சாப்பிட்டது தீய பழக்கமாக மாறியது," என்று பிலேமோன் விவரித்தார். விளையாட்டை நிறுத்தியதால் பள்ளியின் நாஃபா தேர்வில் இரண்டு முறை தோல்வி அடைந்ததாக அவர் கூறினார்.
தேசிய சேவையாளர்களின் உடல் உறுதியை மேம்படுத்தும் 'பிடிபி' (PTP) திட்டத்தின்படி தேசிய சேவையை இவர் முன்கூட்டியே சென்ற பிப்ரவரி 1ஆம் தேதி அன்று தொடங்கினார்.
தற்போதைய ஐபிபிடி (IPPT) முறைப்படி புஷ்அப், சிட்அப், 2.4 கிலோமீட்டர் ஓட்டம் ஆகியவற்றை சேவையாளர்கள் குறிப்பிட்ட நேரத்தில் செய்து முடிக்கவேண்டும். ஜனவரி தொடக்கத்தில் 2.4 கிலோமீட்டர் ஓடி முடிக்க பிலேமோனுக்கு 16 நிமிடங்கள் 20 வினாடிகள் பிடித்தது. ஜூனில் அந்த நேரம் 11 நிமிடங்கள் 45 வினாடிகளாக இருந்தது.
உடற்பயிற்சிச் சோதனையில் தங்க விருதுடன் அடிப்படை ராணுவப் பயிற்சியில் வெள்ளி துப்பாக்கி முனைவாள் (Silver Bayonet) விருதையும் இவர் வென்றிருக்கிறார்.
புலாவ் தெக்கோங்கில் அடிப்படை ராணுவப் பயிற்சியை முடித்த பிறகு பாசிர் லாபாவில் பிலேமோன் ராணுவ நிபுணர் பயிற்சியைத் தொடங்கினார்.
அங்கு ஆயுதங்களைப் பயன்படுத்துவது, போர்க்காலத்தில் வீரர்களை வழிநடத்துவது, சட்ட ஒழுங்கை கட்டிக்காப்பது போன்றவற்றைக் கற்றார் பிலேமோன்.
வாழ்க்கைப் பண்புகள் பலவற்றைப் பற்றி அறிந்து கொண்டதாகவும் இந்த இளையர் கூறினார்.
"தலைமைத்துவத்தில் இருப்பவர்கள் தங்களது துறையை நன்கு அறிந்திருக்கவேண்டும். அத்துடன் தொடர்புத் திறன் மிகவும் முக்கியம். பிரச்சினைகள் பெரிதாகும்போது அவற்றைத் தணிக்கும் வழிகள் ராணுவ போலிசார் அவசியம் கற்கவேண்டிய திறனாகும்," என்றார் பிலேமோன்.
தலைமைத்துவத்தை வெறும் கடமையாக எண்ணாமல் தம்முடன் பணியாற்றுபவர்களுடன் மனம் திறந்து பழகுவது நல்ல தலைவருக்கு அழகு என்பது பிலேமோனின் கருத்து.
"பிறர் நம்மை தயக்கமில்லாமல் அணுகும்படியான வசதியை ஏற்படுத்தவேண்டும். அப்போதுதான் பிரச்சினைகள் ஏற்படும் முன் அவற்றை முன்கூட்டியே தடுத்து நன்கு நிர்வகிக்க முடியும்," என்று அவர் கூறினார்.
செய்தி: கி.ஜனார்த்தனன்