மாணவர் முரசு
இ-பேப்பர்
2022 புலி ஆண்டைக் குறிக்கும் 10 சிறப்பு நாணங்களை சிங்கப்பூர் நாணய ஆணையம் வெளியிட்டு உள்ளது. ஜனவரி 1 முதல் இவை விற்பனைக்கு விடப்படும்.
பாசிர் பாஞ்சாங்கில் சீன புராணக் கதை மற்றும் நாட்டுப்புறக் கதைகளை சித்திரிக்கும் பல்வேறு சிலைகளுடன் புகழ்பெற்று விளங்கிய 'ஹா பார் வில்லா' கலாசார பூங்காவின் பின்னணியுடன் புலி உருவம் நாணயத்தின் ஒரு பக்கம் பொறிக்கப்பட்டு இருக்கும்.
மற்றொரு பக்கம் பொதுவாக நாணயத்தில் காணப்படும் நான்கு மொழியுடன் கூடிய சிங்கப்பூர் சின்னம் 2022 ஆண்டுடன் இருக்கும்.
பத்து நாணயங்களும் வெவ்வேறு உலோகக் கலவை மற்றும் வடிவங்களில் தயாரிக்கப்படும். வெள்ளி நாணயம் என்று அழைக்கப்படும் நிக்கல் பூசப்பட்ட, 41 மில்லிமீட்டர் சுற்றளவு கொண்ட நாணயம் ஒவ்வொன்றின் விலை $2.
மேலும், 60 மில்லிமீட்டர் சுற்றளவு கொண்ட தங்க நாணயத்தின் விலை $200. இதேபோல, தயாரிப்பைப் பொறுத்து வெவ்வேறு விலைகளில் நாணயங்கள் கிடைக்கும்.
ஒவ்வொரு நாணயத்தின் வடிவம் மற்றும் உலோகக் கலவையைப் பொறுத்து 100 முதல் 50,000 வரையிலான எண்ணிக்கையில் தயாரிக்கப்படும்.
தனித்தனி நாணயங்கள் தவிர, வெவ்வேறு வடிவம் மற்றும் உலோக நாணயங்களை உள்ளடக்கிய சிறப்புத் தொகுப்பும் கிடைக்கும்.
சிங்கப்பூர் நாணய ஆலை இவற்றை விற்பனைக்கு விடும். இந்த சிறப்பு நாணயங்களை வாங்க விரும்புவோர் இதன் இணையத்
தளத்தில் நவம்பர் 18 (நேற்று) முதல் டிசம்பர் 17 வரை முன்பதிவு செய்து கொள்ளலாம். இருப்புக்கு அதிகமாக பலர் கேட்டிருந்தால் குலுக்கல் முறையில் தேர்ந்தெடுக்கப்பட்டு விநியோகிக்கப்படும் என்று சிங்கப்பூர் நாணய ஆணையம் தெரிவித்துள்ளது.