பீஷான் ரயில் நிலையத்திலிருந்து
செம்பவாங்கிற்குப் பயணம் செய்யும்போது காயமடைந்த ஒரு 'ஃபிளமிங்கோ' பறவை பெருவிரைவு ரயிலுக்குள் நுழைகிறது. 'ஸ்டேண்ட்-அப் ஸ்டேசி' என்ற கனிவன்புக்கான உருவச் சின்னம் ரயிலின் சுவரில் இருக்கும் ஒட்டுவில்லையைவிட்டு வெளியே வருகிறது. காயமடைந்த அப்பறவைக்குத் தனது இருக்கையை விட்டுக்கொடுக்குமாறு கைபேசியில் மூழ்கியிருக்கும் சிங்கத்திடம் ஸ்டேசி வேண்டிக்கொள்கிறது.
மன்னிப்புக் கேட்டவாறு சிங்கம் தனது இருக்கையை விட்டுக்கொடுக்கிறது. இது உள்ளிட்ட பல காட்சிகள், 'பிசிஎஃப் ஸ்பார்க்கல்டோட்ஸ்' பாலர்பள்ளி மாணவர்கள் உருவாக்கியுள்ள புத்தகத்தில் இடம்பெற்றுள்ளன. இதை நிலப் போக்குவரத்து ஆணையத்துடன் இணைந்து உருவாக்கியுள்ளனர் சிறுவர்கள்.
'மேக்ஸ் அண்ட் ரோபீஸ் மேஜிக்கல் ட்ரெயின் ரைட்' எனப் பெயரிடப்பட்டுள்ள இப்புத்தகத்தில் இடம்பெறும் நிகழ்வுகள், நீ சூன் சென்ட்ரல் வீவக புளோக் 723ல் உள்ள 'பிசிஎஃப் ஸ்பார்க்கல்டோட்ஸ்' மாணவர்களின் கற்பனையில் உருவானவை.
அடுத்த மாதம் 18ஆம் தேதியிலிருந்து அனைத்து 'மெக்டோனல்ட்ஸ்' உணவகங்களிலும் இதைப் பெற்றுக்கொள்ளலாம். வாடிக்கையாளர்கள் செய்யவேண்டியது, மெக்டோனல்ட்ஸ் கிளை ஒன்றில் 'ஹேப்பி மீல்' உணவை வாங்கவேண்டும்.