மாணவர் முரசு
இ-பேப்பர்
தாய், மகள் இருவரும் இத்தாலிக்குச் சென்று புதிதாக விலை உயர்ந்த காலணிகள், கைப்பைகள், ஆடைகளை வாங்கியபோதும் அவற்றை அவர்கள் அனுபவிக்க முடியாமல் போனது. கிட்டத்தட்ட $15,000 பெறுமானமுள்ள அப்பொருள்கள் அவர்கள் இருந்த சுற்றுலாப் பேருந்தில் இருந்து திருடப்பட்டன.
ஈராண்டுகளுக்குப் பிறகு முதல்முறையாக அவ்விருவரும் சென்ற சுற்றுலாவில் இந்த அசம்பாவிதம் நடந்தது.
தடுப்பூசி போட்டோருக்கான பயணப் பாதைத் திட்டத்தின் கீழ் சிங்கப்பூர் பயண முகவர் 'ஈயு ஹாலிடேஸ்' இச்சுற்றுலாவுக்கு ஏற்பாடு செய்திருந்தது. பேருந்தில் பெட்டிகளை வைப்பதற்கான இடத்திலிருந்து 12 பேருக்குச் சொந்தமான மொத்தம் எட்டு பயணப் பெட்டிகள் திருட்டுப் போனதாகக் கூறப்பட்டது.
நேப்பல்ஸ் ஹோட்டல் ஒன்றுக்குச் சென்று பெட்டிகளை இறக்கியபோதுதான் தங்களின் பெட்டிகள் பேருந்தில் இல்லாததைச் சுற்றுலாக் குழு உணர்ந்தது என்றார் பொருள்களைப் பறிகொடுத்த 50 வயது திருவாட்டி இயோ.
சுற்றுலாக் குழு இரவு உணவு சாப்பிட்டுக்கொண்டிருந்தபோது பயணப் பெட்டிகள் திருடப்பட்டு இருக்கலாம் என்று திருவாட்டி இயோவின் 19 வயது மகள் கூறினார்.
துணிமணிகள், மருந்துகள் அனைத்தும் திருடப்பட்டதைக் குறித்து மற்றொரு பயணியும் தமது அதிருப்தியைத் தெரிவித்துக்கொண்டார்.
பயணப் பெட்டிகளின் பொறுப்பு பேருந்து ஓட்டுநரிடம் ஒப்படைக்கப்பட்டதால் ஓட்டுநர் மேலும் கவனமாக இருந்திருக்க வேண்டும் என்று அந்தப் பயணி குறிப்பிட்டார்.
இந்நிலையில் தங்களின் சுற்றுப்பயணக் காப்புறுதித் திட்டத்தின் மூலம் இழந்த பொருள்களுக்காக சிலர் இழப்பீட்டுப் பணம் கோரியுள்ளனர்.