மாணவர் முரசு
இ-பேப்பர்
சக்தி மேகனா
தமது நீண்டநாள் கனவை அடையும் பயணத்தைத் தொடங்கப் போகிறோம் என்ற திருப்தியை தஸ்னிம் நிலோபர் அக்பர் பெற்றுள்ளார். இவ்வாண்டின் வழக்க நிலைத் தேர்வில், சிராங்கூன் உயர்நிலைப் பள்ளியைச் சேர்ந்த தஸ்னிம், 5 புள்ளிகள் பெற்று தொழில்நுட்பக் கல்வி கழகத்தில் தமக்குப் பிடித்தமான 'பேக்கிங், பேஸ்ட்ரி' படிப்புக்குத் தகுதி பெற்றுள்ளார்.
"பேக்கிங் படிக்கவேண்டும் என்பது எனது லட்சியம். இது தொடர்பான யூடியூப் காணொளிகளை நான் நீண்ட காலமாக பார்த்தும் வருகிறேன். எதிர்காலத்தில், வெளிநாடுகளில் பயிற்சி பெற்று எனது பேக்கிங் திறமையை வளர்த்துக்கொள்ள விரும்புகிறேன். மேலும், எனக்குப் பிடித்த 'டேஸ்ட்டி' நிறுவனத்தில் பணிபுரியவும் விரும்புகிறேன்," என்றார் தஸ்னிம். கொவிட்-19 சூழலால் வழக்க நிலைத் தேர்வுக்குத் தயார் செய்வதில் தஸ்னிமுக்குப் பல சவால்கள் ஏற்பட்டன.
"நான் பள்ளியில் மாணவர் தலைவராக இருக்கிறேன். அத்துடன் இந்த ஆண்டு நாடக இணைப்பாட வகுப்பிலும் பங்காற்றியதால், சிங்கப்பூர் இளையர் விழா கொண்டாட்டத்தில் பங்கேற்று சாதனை சான்றிதழை வென்றேன். கொவிட்-19 கிருமித்தொற்று ஏற்படுத்திய மாற்றங்களுக்கிடையே எனது பள்ளிக் கடமைகள், இணைப்பாட நடவடிக்கைகள், தேர்வுகள் ஆகியவற்றைச் சமாளிப்பது சற்று சவாலாக இருந்தது," என்று கூறினார்.
"நான் என் கைப்பேசியைக் குறைந்தது இரண்டு மணி நேரமாவது ஒரு புறம் வைத்துவிட்டு பாடங்களில் கவனம் செலுத்துவேன். படித்தபின் கைப்பேசியைச் சிறிது நேரத்திற்குப் பயன்படுத்துவேன். முக்கியமான, முன்னுரிமை பெறும் வேலைகளை முடித்த பின்னரே நண்பர்களுடன் பேசுவது அல்லது விளையாடுவதற்கு கைப்பேசியை எடுப்பேன்," என்று கூறினார்.
முன்மாதிரி யார் என்று கேட்டபோது தஸ்னிம் வித்தியாசமான பதிலை வைத்திருந்தார்.
"ஜோடி ஸ்வீட்டின் எனும் அமெரிக்க நடிகை, தொலைக்காட்சி பிரபலமே எனது முன்மாதிரி. போதைப்பொருள், மதுப்பழக்கம் ஆகியவற்றுக்கு அடிமையாக இருந்தவர் அவற்றிலிருந்து மீண்டுவந்து இன்று பொதுமக்களிடையே விழிப்புணர்வு இயக்கங்கள் நடத்தி பிறர் வாழ்க்கையில் மாற்றங்கள் ஏற்படுத்தி வருகிறார்," என்று தஸ்னிம் கூறினார்.
கல்வி உபகாரச் சம்பளத்தைப் பலமுறை பெற்றுள்ள தஸ்னிம், "மாணவர்கள் தங்களது லட்சியம் என்னவென்று கண்டறிந்தால் ஊக்கத்தையும் பெற்றுவிடலாம். மன ஆரோக்கியத்தைப் பேணும் அதேவேளையில் கல்வியைக் கைவிட்டு விடக்கூடாது என்பது மாணவர்களுக்கு இவர் வழங்கும் அனுபவப் பரிமாறல்.