மாணவர் முரசு
இ-பேப்பர்
இஸ்லாமிய சமயத்திற்கு எதிரான கருத்துகளையும் பெண்கள் மீது வெறுப்பு தொனிக்கும் கருத்துகளையும் 'இன்ஸ்டகிராம்' சமூக ஊடகத் தளத்தில் பதிவிட்ட பலதுறைத் தொழில்நுட்பக் கல்லூரி மாணவர், சீனாவைச் சேர்ந்தவர் என்று நீதிமன்ற ஆவணங்களில் திருத்திக் குறிப்பிடப்பட்டுள்ளது.
சுன் சிகொங் என்ற அந்த 21 வயது மாணவர், சிங்கப்பூர் நிரந்தரவாசி ஆவார் என்றும் தெரிவிக்கப்பட்டுள்ளது.
முன்னதாக, அவரை சிங்கப்பூரர் என்று நீதிமன்ற ஆவணங்கள் அடையாளம் கண்டிருந்தன.
தெமாசெக் பலதுறைத் தொழில்நுட்பக் கல்லூரி மாணவரான சுன், நேற்று நீதிமன்றத்தில் முன்னிலையானார்.
அச்சுறுத்தல், சமய ரீதியாக பிறரின் உணர்வுகளைக் காயப்படுத்த வேண்டும் என்ற நோக்கில் இணையத்தில் கருத்துகளைப் பதிவிடுதல், ஆபாசப் படங்களை வைத்திருத்தல் ஆகியவை தொடர்பிலான குற்றச்சாட்டுகளை சுன் எதிர்நோக்குகிறார்.
இஸ்லாமிய சமயத்திற்கு எதிரான கருத்துகளைக் கொண்ட பதிவுகளை 2018ஆம் ஆண்டுக்கும் 2019ஆம் ஆண்டுக்கும் இடைப்பட்ட காலத்தில் சுன் உருவாக்கியதாகக் கூறப்படுகிறது.
மேலும், பாலியல் வன்கொடுமைக்கு ஆளான ஒருவர் தமக்கு நடந்ததைக் கூறியதைப் பற்றியும் 2020ஆம் ஆண்டு ஜூன் 7ஆம் தேதியன்று இன்ஸ்டகிராம் பதிவுகள் உருவாக்கி சுன் அச்சுறுத்தல் அளித்ததாகக் கூறப்படுகிறது.
அதே ஆண்டில் ஏப்ரல், மே மாதங்களில் இரண்டு ஆபாசத் திரைப்படங்களை சுன் பதிவிறக்கம் செய்துள்ளதாகவும் அவை அவரின் கைபேசியில் கண்டுபிடிக்கப்பட்டதாகவும் கூறப்படுகிறது.
இஸ்லாமிய சமூகத்திற்கு எதிராக வன்முறையைத் தூண்டும் வகையில் கருத்துகளையும் மிரட்டல்களையும் ஓர் இன்ஸ்டகிராம் பயனாளர் பதிவிட்டுள்ளது குறித்துத் தங்களுக்குப் பல புகார்கள் வந்ததாக 2020ஆம் ஆண்டு ஜூன் மாதத்தில் காவல் அதிகாரிகள் தெரிவித்திருந்தனர்.
பின்னர், அதே ஆண்டு ஜூன் 8ஆம் தேதியன்று ஜூரோங் காவல் பிரிவு அதிகாரிகள் சுன்னைக் கைது செய்தனர்.