மாணவர் முரசு
இ-பேப்பர்
சிங்கப்பூரின் உற்பத்தி திறன் தொடர்ந்து மூன்றாவது மாதமாக கூடியுள்ளது. குறிப்பாக உயிரியல் மருத்துவம், போக்குவரத்து, துல்லியப் பொருளியல் துறைகளில் பதிவான வளர்ச்சியால் சென்ற மாதம் உற்பத்தி ஆண்டுக்காண்டு அடிப்படையில் 15.6 விழுக்காடு அதிகரித்ததாக பொருளியல் மேம்பாட்டு வாரியம் வெளியிட்ட தகவல்கள் தெரிவித்தன.
புள்ளி விவரங்கள் மீண்டும் கணிக்கப்பட்ட பிறகு கடந்த நவம்பர் மாதம் 14.1 விழுக்காடு வளர்ச்சி பதிவானது. ஒட்டுமொத்தமாக சென்ற ஆண்டு உற்பத்தி 13.2 விழுக்காடு கூடியது.
அடிக்கடி மாற்றம் பதிவாகக்கூடிய உயிரியல் மருத்துவ உற்பத்தித் துறையைத் தவிர்த்து சென்ற ஆண்டு பதிவான உற்பத்தி வளர்ச்சி விகிதம் ஐந்து விழுக்காடு. இது, கடந்த நவம்பர் மாதம் பதிவான 11.9 விழுக்காட்டைவிடக் குறைவு.
ஆண்டுக்காண்டு அடிப்படையில் சிங்கப்பூரின் மின்னியல் பொருள்கள் துறையின் வளர்ச்சி சென்ற மாதம் 2.9 விழுக்காடு குறைந்தது. எனினும், சென்ற ஆண்டு முழுவதற்கும் இத்துறை 14.5 விழுக்காடு வளர்ச்சி கண்டது.
உயிரியல் மருத்துவ உற்பத்தி சென்ற மாதம் அதிக அளவில் 87.7 விழுக்காடு அதிகரித்தது. இதே துறையில் மருந்து நிறுவனங்கள் பிரிவு ஆண்டுக்காண்டு அடிப்படையில் 162.3 விழுக்காடு வளர்ச்சி கண்டது. ஒட்டுமொத்தமாக உயிரியல் மருத்துவம் சென்ற ஆண்டு 11.1 விழுக்காடு வளர்ச்சியடைந்தது.
போக்குவரத்துப் பொறியியல் துறை 40.8 விழுக்காடு வளர்ச்சியடைந்தது. சென்ற ஆண்டு முழுவதற்கும் இத்துறை 13.2 விழுக்காடு வளர்ச்சி கண்டது.
துல்லியப் பொறியியல் துறை சென்ற மாதம் 16.4 விழுக்காடு கூடியது.
சென்ற ஆண்டு முழுவதற்கும் இத்துறை 18.9 விழுக்காடு வளர்ச்சி கண்டது.