மாணவர் முரசு
இ-பேப்பர்
பொருள்களை வாங்கிய பிறகு கட்டணத்தைச் செலுத்தும் முறையில் நிகழும் மோசடிகள் குறித்து மக்களை எச்சரிக்கும் நோக்கில் 500,000 துண்டுப்பிரசுரங்கள் விநியோகிக்கப்படவுள்ளன. துண்டுப் பிரசுரங்களை விநியோகிக்கத் தளவாட நிறுவனமான நிஞ்சா வேன் காவல்துறையினர், தேசிய குற்றத்தடுப்பு மன்றம் ஆகிய அமைப்புகளுடன் இணைந்து செயல்பட்டு வருகிறது.
இந்தத் துண்டுப்பிரசுரங்களில் சில, அரசாங்க சார்பற்ற அமைப்புகளின் மூலம் பணிப்பெண்கள், ஊழியர் தங்குமிடங்களில் வசிக்கும் வெளிநாட்டு ஊழியர்கள் ஆகியோருக்கு விநியோகிக்கப்படும். வெளிநாட்டு ஊழியர்களும் பணிப்பெண்களும் அடிக்கடி வாங்கிய பிறகு பொருள்களுக்குக் கட்டணம் செலுத்துவதால் இந்த முயற்சி எடுக்கப்படுகிறது.
இவ்விரு பிரிவினரும் பொருள்களை வாங்கிய பிறகு கட்டணம் செலுத்தும் முறையின் மூலம் மேற்கொள்ளப்படும் மோசடிக்கு ஆளாகும் சாத்தியம் அதிகம் இருப்பதாக 'நிஞ்சா வேன்' நிறுவனத்தின் தலைமை செயல்பாட்டு அதிகாரி லீ கிம் ஹொக் கூறினார். இந்த முறையைக் கொண்டு வாங்கப்படும் பொருள் பொட்டலங்களில் 60 விழுக்காட்டை தங்குமிடங்களில் வசிக்கும் வெளிநாட்டு ஊழியர்கள் வாங்குவதாக அவர் குறிப்பிட்டார். ஆண்டிறுதியில் பலர் அதிகப் பொருள்களை வாங்குவதுண்டு. அதனால் அந்த காலகட்டத்தில் தனது நிறுவனம் கூடுதல் விழிப்புணர்வு நடவடிக்கைகளை மேற்கொள்ளும் என்று திரு லீ தெரிவித்தார்.
விழிப்புணர்வு முயற்சியை ஒன்றாக மேற்கொள்ள 'நிஞ்சா வேன்' சென்ற ஆண்டு நவம்பர் மாதம் தேசிய குற்றத்தடுப்பு மன்றம், காவல்துறை ஆகிய இரண்டையும் நாடியது. இவ்விரு அமைப்புகளும் துண்டுப்பிரசுரங்களை வடிவமைத்தன. தன்னிடமிருந்து பொருள் பொட்டலங்களைப் பெறும் வாடிக்கையாளர்களுக்கு 'நிஞ்சா வேன்' இந்த துண்டுப்பிரசுரங்களை விநியோகித்து வருகிறது.
பொருள்களை வாங்கிய பிறகு கட்டணம் செலுத்தும் முறையில் இடம்பெறும் மோசடி, வேலை வாய்ப்பு மோசடி ஆகிய இரண்டின் தொடர்பிலும் இவை விழிப்புணர்வை வளர்க்கின்றன. பணிப்பெண்களுக்கு இவற்றை வழங்க 'நிஞ்சா வேன்', மனிதவள அமைச்சுடன் இணைந்து செயல்பட்டது. பணிப்பெண்களுக்காக மனிதவள அமைச்சு துண்டுப்பிரசுரங்களை இந்தோனீசிய மொழி, தகாலோக், பர்மிய மொழி, தமிழ் ஆகியவற்றிற்கு மொழி பெயர்த்தது. சென்ற ஆண்டு முற்பாதியில் வேலை மோசடிச் சம்பவங்கள் 16 மடங்கு அதிகரித்தன. மேலும், மோசடிச் சம்பவங்களுக்குப் பறிபோன தொகை 60,000லிருந்து 6.5 மில்லியன் வெள்ளிக்கு அதிகரித்தது.
மோசடிகள் குறித்த விழிப்புணர்வை வளர்க்க 500,000 துண்டுப்பிரசுரங்கள் விநியோகிப்பு