மாணவர் முரசு
இ-பேப்பர்
கொஞ்சம் கலாசாரம், கொஞ்சம் புதுமை. இரண்டும் கலந்த கலவையாக விளங்குகிறது 'தி எலிஃபண்ட் ரூம்' மதுக்கூடம். 'ஆயுர்வேதா', 'மிஸ்டர் டெஸ்கார்', 'கோல்டுஸ்மித்', 'பஃப்லோ ரோடு', 'சட்னி' போன்ற பெயர்களில் புதுவித 'காக்டெய்ல்ஸ்' பானங்களைச் சுவைக்க விரும்புவோர், தெக் லிம் சாலையில் உள்ள இந்த மதுக்கூடத்தை நாடுவர்.
மதுக்கூடத்தை 33 வயது யுக்னேஸ் சுசேலா, செப்டம்பர் 2019ஆம் ஆண்டு திறந்தார்.
"இந்திய மதுபான வகைகளில் தரம் அதிகம் இல்லை என்ற தவறான கருத்து மக்களிடையே நிலவுகிறது. ஆனால் எங்களது 'காக்டெய்ல்ஸ்' வகைகளை ருசித்து பார்த்தால் அந்தக் கருத்து நிச்சயம் மாறும். பஞ்சாப் மாநிலத்தின் பாஸ்மதி அரிசி வோட்கா, 'கிரீடி ஏஞ்சல்ஸ்' என்ற அதிக விலை கொண்ட இந்தியன் விஸ்கி போன்றவற்றை நாங்கள் விற்பனை செய்கிறோம்," என்றார் யுக்னேஸ்.
"சிங்கப்பூரின் லிட்டில் இந்தியா என்றாலே முஸ்தஃபா, ரேஸ் கோர்ஸ் சாலை போன்ற பெயர்களே மக்களின் ஞாபகத்திற்கு வரும். நாங்கள் லிட்டில் இந்தியாவின் 18ஆம் நூற்றாண்டு வரலாற்றை அடிப்படையாகக் கொண்டு புதிய பானங்களைத் தயாரித்துள்ளோம். இதனால், லிட்டில் இந்தியா பகுதியிலுள்ள சாலைகளின் பெயர்களை மக்கள் அறிந்திட முடிகிறது," என்றார் அவர்.
உடல் ஆரோக்கியத்தையும் மையமாகக் கொண்டு இந்த நவீன மதுக்கூடத்தில் மதுபானங்கள் தயாரிக்கப்படுகின்றன. உதாரணத்திற்கு, 'ஆயுர்வேதா' என்ற பானத்தில் நிலவேம்பு, நெல்லிக்கனி, திராட்சைகள் போன்றவை சேர்க்கப்பட்டிருக்கும். 'த கீர்' என்ற பெயர் கொண்ட மதுபானத்தில் ஏலக்காய், தேங்காய் போன்றவை உள்ளன.
மதுபானங்களுக்கு ஏற்ற உணவு வகைகளும் இந்த மதுக்கூடத்தில் விற்கப்படுவது மற்றுமொரு சிறப்பு.
இந்திய பொரித்த கோழி 'பர்கர்', பலாப்பழ இறைச்சி உருண்டைகள், மூன்று வகை சட்னியுடன் அப்பளம், கரம் மசாலா கலவை
யுடன் சுண்டல் ஆகியவை வாடிக்கையாளர்களிடையே பிரபலமாக உள்ளன.
மதுக்கூடத்தில் வழங்கப்படும் பானங்களில் பயன்படுத்தப்படும் தனித்துவமான இந்திய நறுமணப் பொருள்களும் மசாலா பொருள்களும் கடையின் மேசைகளை அழகுபடுத்துவதுடன் வருவோரின் கலந்துரையாடலுக்கு மையப் பொருள்களாகவும் உள்ளன.
கொவிட்-19 சூழல் ஒரு பக்கம், மதுக்கூடங்களுக்கிடையே பயங்கர போட்டி மறுபக்கம். இவ்வாறு கடந்த சில மாதங்கள் சற்று சவால்மிக்கதாக அமைந்தபோதும் மக்களின் வரவேற்பு அமோகமாக உள்ளதாக யுக்னேஸ் தெரிவித்தார்.
எல்லா இனத்தவருக்கும் ஏற்ற சூழலைத் தரும் 'தி எலிஃபண்ட் ரூம்', சிங்கப்பூரின் தலைசிறந்த 50 மதுக்கூடங்கள் பட்டியலில் இடம்பெற்றுள்ளது. ஆசியாவின் சிறந்த ஐம்பது மதுக்கூடங்கள் பட்டியலிலும் இடம்பெற வேண்டும் என்பது தமது அடுத்த இலக்கு என்றார் யுக்னேஸ்.