மாணவர் முரசு
இ-பேப்பர்
2020 லீ குவான் இயூ உலக நகரத்திற்கான பரிசை வியன்னா நகர் தட்டிச் சென்றுள்ளது.
துடிப்புமிக்க, வாழ்வதற்கு ஏற்ற, நீடித்து நிலைக்கக்கூடிய நகர சமூகங்களை சிறந்த முறையில் உருவாக்கும் நகரங்களுக்கு இந்தப் பரிசு ஈராண்டுக்கு ஒருமுறை வழங்கப்படுகிறது.
சிங்கப்பூரின் நகர மறுசீரமைப்பு ஆணையமும் வாழ்வதற்கேற்ற நகரங்களுக்கான மையமும் இணைந்து ஏற்பாடு செய்யும் இந்நிகழ்வுக்கு கெப்பல் கார்ப்பரேஷன் பொறுப்பாதரவு வழங்குகிறது.
பரிசை வென்றுள்ள ஆஸ்திரிய தலைநகரான வியன்னா, வரும் ஜூலை 31 முதல் ஆகஸ்ட் 3 வரை இங்கு நடைபெற உள்ள உலக நகரங்களின் உச்சநிலைச் சந்திப்பின்போது கௌரவிக்கப்படும்.
விருது சான்றிதழ், தங்கப் பதக்கம் ஆகியவற்றோடு $300,000 ரொக்கப் பரிசும் கெப்பல் கார்ப்
பரேஷன் பொறுப்பாதரவில் வழங்கப்படும்.
கலாசாரம், இசை மற்றும் வரலாறு ஆகியவற்றுக்குப் புகழ்பெற்ற நகரம் என்றும் தலைசிறந்த அடையாளத்தை இழக்காமல் 21ஆம் நூற்றாண்டின் வெற்றிக்குத் தன்னைத் தானே தயார்ப்படுத்திக்கொண்ட நகரம் வியன்னா.
மேலும் பருவநிலை மாற்றத்தின் உலக சவால்களைச் சமாளிப்பதில் உலகுக்கு ஓர் எடுத்துக்காட்டாக இது விளங்குகிறது.
உதாரணத்திற்கு, வெப்பத் தணிப்புத் திட்டங்களை அந்நகர் வெற்றிகரமாகச் செயல்படுத்து கிறது.
கிராமப்புறங்களைக் காட்டிலும் அதிக வெப்பத்துடன் இருக்கும் நகரங்களில் அதிகமான பசுமை வெளிகளை ஏற்படுத்தும் திட்டங்களும் அவற்றுள் அடங்கும்.
மேலும், வெள்ளத்திலிருந்து பாதுகாப்பதற்கான நடவடிக்கைகளை 1884ஆம் ஆண்டு முதல் இந்த நகரம் செயல்படுத்தி வருகிறது.
அதன் ஒரு பகுதியாக 'நியூ டேனுப்' என்ற பெயரில் 1989ஆம் ஆண்டு 21 கிலோ மீட்டர் நீள மாற்றுப் பாதையை அது அமைத்தது. வெள்ளம் ஏற்படாத வேளையில் இது பொதுப் பூங்காவாக மாறும் வகையில் இது அமைக்கப்பட்டது.