மாணவர் முரசு
இ-பேப்பர்
உக்ரேனிய போரும் ரஷ்யா மீதான தடைகளும் எத்தகைய தாக்கத்தை ஏற்படுத்தும் என்பதை சிங்கப்பூர் நிறுவனங்கள் மதிப்பீடு செய்து வருகின்றன.
அமெரிக்கா, சிங்கப்பூர், ஐரோப்பிய நாடுகள் உட்பட பல நாடுகள் ரஷ்யா மீது பல்வேறு தடைகளை விதித்துள்ளன.
இந்தத் தடைகளால் உலக அளவில் பல துறைகளில் பல்வேறு பாதிப்புகள் ஏற்பட்டுள்ளன.
இந்த நிலையில் உக்ரேனிய போர் மற்றும் ரஷ்யாவுக்கு எதிரான தடைகளின் தாக்கத்தை முழுமையாகப் புரிந்துகொள்ள சில காலம் பிடிக்கும் என்று சிங்கப்பூர் தொழில்துறையினரும் வர்த்தக சங்கங்களும் தெரிவித்துள்ளன.
உக்ரேன் மீது படையெடுத்துள்ள ரஷ்யாவைக் கண்டிக்கும் வகையில் அந்நாட்டுக்கு எதிராக விதிக்கப்பட்ட தடைகள் குறித்து இம்மாததொடக்கத்தில் கூடுதல் விவரங்களை சிங்கப்பூர் அரசாங்கம் வெளியிட்டது.
மின்னணுவியல் பொருள்கள் உட்பட குறிப்பிட்ட பொருள்களை ரஷ்யாவுக்கு ஏற்றுமதி செய்ய தடை விதிக்கப்பட்டுள்ளது.
சிங்கப்பூரில் உள்ள வங்கிகளும் இதர நிதி நிறுவனங்களும் ரஷ்யாவின் நான்கு வங்கிகளுடன் வர்த்தகங்களில் ஈடுபடவும் தடை விதிக்கப்பட்டுள்ளது.
சிங்கப்பூரிலிருந்து கப்பல் மூலம் ஏற்றுமதி செய்யப்படும் அல்லது சிங்கப்பூர் வழியாகச் செல்லும் பொருட்களுக்கும் தடை பொருந்தும் என அறிவிக்கப்பட்டுள்ளது.
சிங்கப்பூரின் ஏற்றுமதி கட்டுப்பாடுகளால் சிங்கப்பூர் ராணுவப் பொருள்களின் பட்டியலில் இடம்பெற்றுள்ள அனைத்துப் பொருள்கள், கணினி சில்லுகள், உயர்சக்தி, உயர் அழுத்த நேரடி மின்சார விநியோகச் சாதனங்கள், மின்னிலக்கச் சில்லுகள், கணினி, தொலைத்தொடர்பு இடைமறிப்பு சாதனங்கள் ஆகியவை பாதிக்கப்படும்.
சிங்கப்பூர் வர்த்தக சம்மேளனத்தின் தலைமை நிர்வாகியான லாம் யி யோங், சிங்கப்பூர் விதித்துள்ள தடைகளாலும் 'நட்பற்ற நாடுகள்' என்று ரஷ்யாவால் குறிப்பிடப்படும் நாடுகளுடன் போட்டுள்ள வர்த்தக ஒப்பந்தங்கள் மீதான ரஷ்யாவின் நடவடிக்கைகளாலும் பாதிப்பு ஏற்படும் என்று கூறியுள்ளார்.
"ரஷ்ய நிறுவனங்களுடனான வர்த்தக நடவடிக்கைளில் சிங்கப்பூர் நிறுவனங்கள் எச்சரிக்கையுடன் செயல்பட வேண்டும்," என்று வலியுறுத்தியுள்ள அவர், "தேவை ஏற்பட்டால் சட்ட ஆலோசனைகளை நாடலாம்," என்று அறிவுறுத்தியுள்ளார்.
தொழில்சபையில் உறுப்பினர் களாக உள்ள நிறுவனங்களுக்கு உதவி வழங்குவதற்கான நடவடிக்கைகள் எடுக்கப்பட்டு வருவதாகவும் அவர் தெரிவித்தார்.
சிங்கப்பூரில் உள்ள ரஷ்ய வர்த்தகப் பிரதிநிதியான அலெக்சாண்டர் ஸ்வினின், நூற்றுக்கணக்கான ரஷ்யத் தொழில்முனைவோர்கள் சிங்கப்பூருடனும் ஏராளமான சிங்கப்பூர் நிறுவனங்களுடனும் வர்த்தகத் தொடர்புகளை வைத்திருப்பதாகவும் ரஷ்யாவில் வர்த்தகங்களில் ஈடுபடுவதாகவும் தெரிவித் தார்.
ஆனால் சிங்கப்பூர் ஏற்றுமதி கட்டுப்பாடுகளால் இங்குள்ள நிறுவனங்களுக்கு ஏற்படும் பாதிப்பு குறித்து கருத்து தெரிவிக்க அவர் மறுத்துவிட்டார்.
பாதிப்பைத் தெரிந்துகொள்ள சில காலம் ஆகலாம் என்றார் அவர்.
ரஷ்யாவுடனான சிங்கப்பூர் வர்த்தகப் பொருள்களின் மதிப்பு 2021ல் ஐந்து பில்லியன் வெள்ளியாகும். சிங்கப்பூரிலிருந்து மின்னணுவியல் மற்றும் சாதனங்கள் அதிக அளவில் ரஷ்யாவுக்கு ஏற்று மதி செய்யப்படுகின்றன. ரஷ்யாவில் இருந்து பெட்ரோலியம், உலோகங்களை சிங்கப்பூர் அதிகம் இறக்குமதி செய்து வருகிறது.