வீடமைப்பு வளர்ச்சிக் கழக வீடுகள் மற்றும் தனியார் அடுக்குவீடுகள் ஆகியவற்றின் வாடகை விலைகள் கடந்த மாதமும் ஏற்றம் கண்டன. இருப்பினும் வாடகைப் பரிவர்த்தனை எண்ணிக்கையில் சற்று இறக்கம் காணப்பட்டது.
வீவக வீடுகளின் வாடகை பிப்ரவரியில் 1.7 விழுக்காடு அதிகரித்தது. அதேபோல கொண்டோமினிய வீடுகளின் வாடகை 1.4 விழுக்காடு ஏறியதாக '99.co', எஸ்ஆர்எக்ஸ் ஆகிய சொத்துச் சந்தை இணையத்தளங்கள் நேற்று தெரிவித்தன. பிப்ரவரி நிலவரத்தையும் சேர்த்து, வீவக வீடுகளின் வாடகை தொடர்ந்து 20வது மாதமாகவும் கொண்டோமினிய வாடகை தொடர்ந்து 14வது மாதமும் உயர்ந்துள்ளன.
ஆண்டுக்காண்டு ஒப்பிடுகையில் கொண்டோமினிய வாடகை இந்த பிப்ரவரியில் 11.8 விழுக்காடு அதிகரித்துள்ளது. மத்திய வட்டாரம், நகரை ஒட்டிய பகுதிகள், புற
நகர் பகுதிகளில் இந்த வாடகை ஏற்றம் காணப்பட்டது.
மொத்தம் 4,248 கொண்டோமினிய வீடுகள் வாடகைக்கு விடப்பட்டதாக மதிப்பிடப்பட்டது.
இது ஜனவரி மாதத்தின் 4,473 வீடுகளைக் காட்டிலும் 5 விழுக்காடு குறைவு. மொத்த வாடகை விகிதத்தில் புறநகர்ப் பகுதியில் அமைந்த வீடுகளே 37.3 விழுக்காட்டை வகித்தன.
கட்டுமானத் தாமதம் காரணமாக புதிய வீடுகளுக்குப் பற்றாக்குறை இருப்பதும் வாடகை ஏற்றம் கண்டு வருவதற்குக் காரணம் என்று சொத்துச் சந்தை நிபுணர்கள் கூறு கின்றனர்.