மாணவர் முரசு
இ-பேப்பர்
சிங்கப்பூரின் உற்பத்தி எதிர்பாரா விதமாக அபாரமாக மீண்டு வந்துள்ளது. கடந்த ஜனவரி மாதம் உற்பத்தி வளர்ச்சி மந்தமாக இருந்தது.
மின்னணுவியல் துறையில் 'சிப்ஸ்' எனும் சில்லுகளின் உற்பத்தி வளர்ச்சி கண்டது. ஒட்டுமொத்த உற்பத்தி வளர்ச்சி சூடுபிடித்ததற்கு இது முக்கியக் காரணம்.
ஆண்டுக்காண்டு அடிப்படையில் சென்ற மாதம் உற்பத்தி 17.6 விழுக்காடு வளர்ச்சியடைந்தது. கடந்த ஜனவரி மாதம் இந்த விகிதம் 2.4 விழுக்காடாக மட்டுமே இருந்தது.
சென்ற மாதம் உற்பத்தி 6.3 விழுக்காடு வளர்ச்சிகாணும் என்று புளூம்பர்க் செய்தி நிறுவனம் நடத்திய கருத்தாய்வில் கவனிப்பாளர்கள் கணித்திருந்தனர்.
இறுதியில் பதிவான வளர்ச்சி விகிதம் அதைவிட கணிசமாக அதிகம்.
உற்பத்தித் துறையில் இது கடந்த எட்டு மாதங்களில் பார்த்திராத வளர்ச்சி. மேலும், தொடர்ந்து ஐந்தாவது மாதமாக இத்துறை வளர்ச்சிகண்டுள்ளது.
உயிரியல் மருத்துவ உற்பத்தித் துறையைத் தவிர்த்துப் பார்க்கையில் சென்ற மாதம் உற்பத்தி 16.8 விழுக்காடு வளர்ச்சியடைந்தது என்று பொருளியல் வளர்ச்சிக் கழகம் வெளியிட்ட புள்ளி விவரங்கள் தெரிவித்தன.
மின்னணுவியல் துறையில் ஆண்டுக்காண்டு அடிப்படையில் 32.4 விழுக்காடு வளர்ச்சி கண்டது. கடந்த ஜனவரி மாதம் இந்தத் துறையில் உற்பத்தி ஒரு விழுக்காடு மட்டுமே வளர்ச்சியடைந்தது.
மின்னணுவியல் துறை சிங்கப்பூருக்கு மிகவும் முக்கியமான ஒன்று. சென்ற மாதத்தின் மொத்த உற்பத்தியில் 40 விழுக்காடு இந்தத் துறையைச் சேர்ந்தது.
அதிக மாற்றங்கள் ஏற்படக்கூடிய உயிரியல் மருத்துவத் துறையில் சென்ற மாதம் உற்பத்தி 25.3 விழுக்காடு வளர்ச்சிகண்டது. கடந்த ஜனவரி மாதம் இந்த விகிதம் 8.8 விழுக்காடாகப் பதிவானது.
துல்லியப் பொருளியலின் உற்பத்தி சென்ற மாதம் கணிசமாகக் குறைந்தது. கடந்த ஜனவரி மாதம் இத்துறையில் உற்பத்தி 11.2 விழுக்காடு வளர்ச்சியடைந்தது. சென்ற மாதம் இந்த விகிதம் ஒன்றுக்குக் குறைந்தது.
போக்குவரத்துத் துறையில் உற்பத்தியின் வளர்ச்சி விகிதம் விழுந்தது. இத்துறையில் கடந்த ஜனவரி மாதம் உற்பத்தியின் வளர்ச்சி 14.7 விழுக்காடாக இருந்தது. இந்த விகிதம் சென்ற மாதம் 4.5க்குக் குறைந்தது.
உலகளவில் எல்லைக் கட்டுப்பாடுகள் தளர்த்தப்பட்டு வருவதைத் தொடர்ந்து சென்ற மாதம் விமானத் துறையில் உற்பத்தி 11.3 விழுக்காடு வளர்ச்சிகண்டது.