மாணவர் முரசு
இ-பேப்பர்
கொவிட்-19 தொற்று காரணமாக அதிக உணவகங்கள் தொழில்நுட்பத்தைத் தழுவிக் கொண்டன.
ஓர் உணவகத்தில் என்னென்ன உணவு கிடைக்கும் என்பதை கியூஆர் குறியீட்டை வருடி தெரிந்துகொள்ளும் ஒரு தொழில்நுட்பம் கொவிட்-19க்குப் பிந்திய வருங்காலத்திலும் கைக்கொள்ளப்படும் என்று பல உணவகங்கள் தெரிவித்ததாக சண்டே டைம்ஸ் குறிப்பிட்டு உள்ளது.
வாடிக்கையாளர்களில் சிலர் வழக்கமான உணவு விவர குறிப்பேடுகளைப் பார்த்து தங்களுக்குத் தேவையான உணவைத் தேர்ந்தெடுக்கவே விரும்புகிறார்கள் என்றாலும் மின்னிலக்க ரீதியிலான உணவுப் பட்டியல் தாங்கள் சிறப்பாகச் செயல்பட உதவி இருப்பதாக உணவகங்கள் கூறுகின்றன. சண்டே டைம்ஸ் 12 உணவகங்களைச் சந்தித்தது. அவற்றில் 10 உணவகங்கள் கியூஆர் குறியீட்டு உணவுப் பட்டியலைப் பயன்படுத்துகின்றன.
சாப்பாட்டு மேசையில் கியூஆர் குறியீட்டை காட்டும் ஓர் அச்சுத்தாள் வைக்கப்பட்டு இருக்கும். வாடிக்கையாளர்கள் தங்கள் மின்னிலக்கச் சாதனத்தின் மூலம் அதை வருடலாம்.
அப்படி செய்யும்போது அந்த உணவகத்தில் என்னென்ன சாப்பாடு கிடைக்கும் என்பதை வாடிக்கையாளர்கள் தெரிந்துகொள்ளலாம். அதைப் பார்த்து தேவையானதை கேட்டு வாங்கி சாப்பிடலாம்.
பணத்தை மின்னிலக்கம் மூலம் அல்லது நேரடியாக காசாளரிடம் செலுத்திவிடலாம்.
கியூஆர் குறியீடு பலரும் தொடக்கூடிய ஒரு தரையையோ, மேசையையோ பயன்படுத்த வேண்டிய தேவையை குறைத்துவிடுகிறது என்று சிங்கப்பூர் உணவகச் சங்கத்தின் பேச்சாளர் கூறினார்.
கியூஆர் குறியீடு மூலம் வாடிக்கையாளர்களின் கருத்துகளையும் உணவகங்கள் பெறமுடியும்.
இதனிடையே, 14 வாடிக்கையாளர்களில் ஐந்து பேர் தாங்கள் வழக்கமான கையேடு வடிவிலான உணவுப் பட்டியலைப் பார்த்து தேவையான உணவை வாங்கி உண்ண விரும்புவதாகக் கூறினர்.
உணவுப் பட்டியல் மின்னிலக்க ரீதியில் இருந்தாலும் அச்சிடப்பட்ட கையேடு வடிவில் இருந்தாலும் எல்லாம் ஒன்றுதான் என்று மற்றவர்கள் தெரிவித்தனர்.
தொழில்நுட்பத்தைப் பயன்படுத்துவதால் தங்கள் செயல்பாடுகள் மேம்பட உதவி கிடைத்து இருக்கிறது என்று அதிகமான உணவகங்கள் தெரிவித்தன.
தொழில்நுட்பங்கள் காரணமாக ஊழியர்களைச் சிறந்த முறையில் பணியில் பிரித்து அமர்த்த முடிவதாகவும் அவை குறிப்பிட்டன.
இருந்தாலும் சில உணவகங்கள் வழக்கமான கையேடு வடிவிலான உணவுப் பட்டியலைத் தொடர்ந்து பயன்படுத்தவே விரும்புவதாக தெரிவித்தன.
'ஃபியுஷன்பொலிஸ் வே' கட்டடத்தில் செயல்படும் 'ரெஸ்டாரெண்ட் பைட்ராசண்டா' என்ற இத்தாலிய உணவகத்தின் உரிமையாளரான திரு லோரிஸ் மாசிமினி, மின்னிலக்க உணவுப் பட்டியலைப் பயன்படுத்துவதால் பல நன்மைகள் இருக்கின்றன என்பதை ஒப்புக்கொண்டார்.
இருந்தாலும்கூட கையேடு வடிவிலான பட்டியல் காரணமாக தன்னுடைய உணவகமும் விருந்தினர்களும் நேரடியாகக் கலந்துறவாட முடியும் என்று அவர் குறிப்பிட்டார்.
மின்னிலக்கப் பட்டியலைப் பயன்படுத்தும் வாடிக்கையாளர்கள், தங்களுடைய கைபேசியைப் பார்த்தே தேவையான உணவை முடிவு செய்துவிடுவார்கள்.
ஆனால் எங்கள் உணவகத்தில் மனிதர்களுக்கு மனிதர்கள் இடைப்பட்ட அன்புறவு இருக்க வேண்டும் என்று விரும்புகிறோம். உணவகங்களில் இத்தகைய அன்புறவே அடிப்படையான ஒன்று என்று அவர் குறிப்பிட்டார்.