மாணவர் முரசு
இ-பேப்பர்
ஒவ்வொரு முறையும் தோல்வி நிலைக்குத் தள்ளப்படும்போதும் ஹாக்கியைக் கைவிடாமல் இறுகப் பிடித்திருந்தார் அரசு. மேடுபள்ளம் நிறைந்த தன் விளையாட்டுப் பயணத்தை நம்பிக்கையுடன் தொடர்கிறார் இவர். அதே சமயம், தனக்கு வழிகாட்டிய ஆசிரியர்
களின் வழியிலேயே சென்று எதிர்காலத்தில் கல்வியாளர் ஆகும் கனவைக் கொண்டுள்ளார் அவர்.
தேசிய ஹாக்கி அணியில் 2017ஆம் ஆண்டில் இணைந்த அரசுக்கு, சிங்கப்பூரைப் பிரதிநிதிக்க வேண்டும் என்ற நீண்டநாள் லட்சியம் நிறைவேறியது. முந்தைய தேசிய ஹாக்கி அணிகள் போட்டிகளில் முதல் மூன்று இடங்களைப் பிடித்திருந்த நிலையில், அந்த சாதனையைக் கட்டிக்காக்கும் கடமையைத் தானும் கொண்டிருப்பதாக பகிர்ந்துகொண்டார் அரசு.
தேசிய அணியுடன் 2019ஆம் ஆண்டு தென்கிழக்காசிய விளையாட்டுகளில் வெண்கலப் பதக்கத்தை வென்ற இவர், தங்களின் குறிக்கோள் நிறைவேறிய அத்தருணத்தின் உணர்ச்சிகள் மறக்கமுடியாதவையென நெகிழ்ந்தார்.
"என் குடும்பத்தினர் மிகவும் பெருமைப்பட்டனர். இந்த வாய்ப்புக்காக நான் கடுமையாக உழைத்திருந்தேன். வாரத்தில் ஐந்தாறு முறை பயிற்சி செய்யவேண்டிய நிலையிலும் நான் மனந்தளரவில்லை," என்றார் தேசியக் கல்விக் கழகத்தில் பயிற்சி பெறும் 24 வயது சித அரசு.
ஜூரோங்கிலிருந்த தேசியக் கல்விக் கழகத்திலிருந்து பாசிர் ரிஸ் வட்டாரத்தில் உள்ள தன் பயிற்சியிடத்துக்குச் செல்ல அரசுக்குக் கிட்டத்தட்ட ஒன்றரை மணி நேரம் பிடிக்கும். தினமும் பயிற்சிக்குச் சென்று வந்த இவர், நள்ளிரவில்கூட தேசியக் கல்விக் கழகத்திற்குச் சென்று தன் பாடங்களை முடித்துள்ளார். பரபரப்பான வாழ்க்கைச் சூழலில், தான் உடலளவில் மட்டுமே சோர்ந்ததாகவும் மனதளவில் சோர்ந்திடவில்லை என்றும் கூறுகிறார் அரசு. கல்வித்துறைக்குத் தேவைப்படும் பொறுமையையும் ஒழுக்கத்தையும் இவ்விளையாட்டு தனக்குக் கற்றுக் கொடுத்துள்ளதாக இவர் கூறுகிறார்.