மாணவர் முரசு
இ-பேப்பர்
தமிழ் முரசு நாளிதழின் துணை செய்தி ஆசிரியர் இர்ஷாத் முஹம்மது (படம்), ஸ்ட்ரெய்ட்ஸ் டைம்ஸ் செய்தியாளர்களுடன் இணைந்து எழுதிய உடனடிச் செய்தி ஒன்று ஆசிய ஊடக விருதுகளில் தங்கப் பதக்கம் வென்றுள்ளது. WAN-IFRA எனும் உலக செய்தி பதிப்பாளர்கள் சங்கத்தின் ஆசிய ஊடக விருதுகள் 2022 நிகழ்ச்சியில் சிங்கப்பூர் பிரஸ் ஹோல்டிங்ஸ் நிறுவனத்துக்கு மொத்தம் நான்கு விருதுகள் கிடைத்தன.
இதர ஸ்ட்ரெய்ட்ஸ் டைம்ஸ் செய்தியாளர்களுடன் இணைந்து கடந்த ஆண்டு பிப்ரவரி மாதம் தஞ்சோங் பகாரில் நடந்த சாலை விபத்து குறித்து திரு இர்ஷாத் முஹம்மது எழுதிய 'தீப்பற்றிய கார் விபத்தில் ஐவர் மரணம்' என்ற செய்தி தலைசிறந்த உடனடிச் செய்தியாகத் தேர்ந்தெடுக்கப்பட்டது.
ஸ்ட்ரெய்ட்ஸ் டைம்ஸின் டேவிட் சன், கோக் யுஃபெங், ஃபேபியன் கோ, சியோ சூ-ஆன், எங் வெய் காய் ஆகியோருடன் இவ்விருதினை திரு இர்ஷாத் பகிர்ந்து கொண்டுள்ளார்.
"சீனப் புத்தாண்டின் இரண்டாவது நாளானது, என்னுடைய பணியில் மறக்கமுடியாததோர் அனுபவமாக அமைந்தது. அன்று அதிகாலை நடந்த சாலை விபத்து குறித்த செய்தி திரட்டும் பணி கொடுக்கப்பட்டபோது, ஐந்து பேர் பலியான ஒரு கொடூரச் சம்பவமாக அது இருக்கும் என எதிர்பார்க்கவில்லை. சம்பவ இடத்துக்குச் சென்றபோதுதான் எந்த அளவுக்குப் பரிதாபமான சம்பவம் அது என்று எங்களுக்குத் தெரிந்தது," என்று திரு இர்ஷாத் தனது அனுபவத்தைப் பகிர்ந்துகொண்டார்.
"எந்தவொரு திட்டமும் இன்றி, திடீரென ஒரு குழு நடவடிக்கையில் தள்ளப்பட்டது போன்றதோர் உணர்வு இருப்பினும், ஒருவருடன் ஒருவர் கைகோத்து அன்று நடந்தவற்றையெல்லாம் ஒருங்கிணைத்து தொகுத்து வழங்கினோம்," என்றார் அவர்.
செய்தியாளர்கள் விருது வென்றது குறித்து மகிழ்ச்சி தெரிவித்த எஸ்பிஎச் மீடியா டிரஸ்ட் தலைமை நிர்வாக அதிகாரி திருவாட்டி டியோ லே லிம், "செய்தித்தாள் வடிவமைப்பு, கட்டுரைக் கருத்துகள், புகைப்பட இதழியல், தகவல் வரைகலை, விளம்பரம் ஆகியவற்றில் தலைசிறந்த பதிப்புத் தரங்களை ஊக்குவிக்கும் நோக்கமுடைய இந்த வருடாந்திர விருது நிகழ்வில் நாம் நான்கு விருதுகளை வென்றுள்ளோம். செய்தித்தாள் பதிப்புத் துறையில் நாம் தலைசிறந்து விளங்குகிறோம் என்பதற்கு நமது செய்தியாளர்களின் சாதனைகளே சான்று," என்றார்.
சாவ்பாவ் சீன நாளிதழ் புகைப்படச் செய்தியாளர் திரு குவோங் காய் சுங் விளையாட்டுப் புகைப்படப் பிரிவில் தங்கப் பதக்கம் வென்றார். அதே பிரிவில் வெள்ளிப்பதக்கம் வென்றார் ஸ்ட்ரெய்ட்ஸ் டைம்ஸின் புகைப்படச் செய்தியாளர் கெவின் லிம். தலைசிறந்த நாளிதழ் விளம்பரப் பிரிவில் எஸ்பிஎச் மீடியா டிரஸ்ட்டுக்கு வெள்ளிப் பதக்கம்.