மாணவர் முரசு
இ-பேப்பர்
எஸ்ஸோ நிறுவனம் பெட்ரோல் விலையை மூன்று வெள்ளிக்கும் கீழே குறைத்துள்ளது. இவ்வாறு செய்த முதல் பெட்ரோல் நிறுவனம் எஸ்ஸோ ஆகும். எஸ்ஸோ நேற்று மாலை 4 மணி அளவில் விலையைக் குறைத்ததாக ஃபியுல் காக்கி இணையத்தளம் கூறியது.
பெட்ரோல் விலையைக் கண்காணிக்க சிங்கப்பூர் வாடிக்கையாளர் சங்கம் உருவாக்கியுள்ள இணையத்தளம் அதுவாகும்.
92 ஆக்டேன் ரக பெட்ரோல் ஒரு லிட்டருக்கு $2.96ஆகக் குறைக்கப்பட்டுள்ளது. இது கடந்த வார விலையைவிட 14 காசு குறைவு. டீசல் விலை ஒரு லிட்டருக்கு $2.97ஆக உள்ளது. இது கடந்த வார விலையைவிட 4 காசு குறைவு.
95 ஆக்டேன் ரக பெட்ரோலை லிட்டருக்கு $3.01க்கு எஸ்ஸோ விற்கிறது. 98 ஆக்டேன் ரக பெட்ரோலின் விலை $3.48 ஆகக் குறைக்கப்பட்டுள்ளது. இவை இரண்டின் விலையும் கடந்த வாரம் இருந்ததைவிட 14 காசு குறைக்கப்பட்டுள்ளது.
ஏப்ரல் மாதத்துக்குப் பின்னர் கச்சா எண்ணெய்யின் விலை பீப்பாய்க்கு 100 அமெரிக்க டாலருக்கும் கீழே குறைந்ததை அடுத்து பெட்ரோல், டீசல் விலையை எஸ்ஸோ குறைத்துள்ளது.
வரும் நாள்களில் மற்ற எண்ணெய் நிறுவனங்களும் பெட்ரோல், டீசல் விலையைக் குறைக்கும் என்று எதிர்பார்க்கப்படுகிறது.