மாணவர் முரசு
இ-பேப்பர்
டாக்சி நிறுவனங்கள் தற்போது அறிவிக்கப்பட்டுள்ள தற்காலிகக் கட்டண உயர்வு இந்த ஆண்டு டிசம்பர் 31ஆம் தேதி வரை தொடரும் என்று தெரிவித்துள்ளன.
பயணத் தொலைவு, காத்திருக்கும் நேரம் ஆகியவற்றுக்கான கட்டணங்கள் ஒரு காசு உயர்த்தப்படுவதாக கடந்த ஏப்ரல் மாதம் அறிவிக்கப்பட்டது. எரிபொருள் விலை உயர்வால் சிரமப்படும் டாக்சி ஓட்டுநர்களுக்கு இது கைகொடுக்கும் என்று கருதப்படுகிறது.
'எஸ்எம்ஆர்டி' நிறுவனத்துக்குச் சொந்தமான 'ஸ்டிரைட்ஸ்' டாக்சி நிறுவனம் இந்த நீட்டிப்பு குறித்து நேற்று அதன் ஃபேஸ்புக் பக்கத்தில் பதிவிட்டது. சென்ற வாரம் இதேபோன்ற அறிவிப்பை, 'பிரிமியர்' டாக்சி நிறுவனம் அதன் இணையத் தளத்தில் வெளியிட்டிருந்தது.
இதர மூன்று டாக்சி நிறுவனங்களான 'கம்ஃபர்ட் டெல்குரோ', 'டிரான்ஸ் கேப்', 'பிரைம் டாக்சி' ஆகியவையும் தங்கள் கட்டண உயர்வை இவ்வாண்டு இறுதிவரை நீட்டிப்பதாக ஸ்ட்ரெய்ட்ஸ் டைம்சிடம் தெரிவித்தன.
முன்னதாக எரிபொருள் விலை குறைந்த பிறகோ சென்ற மே மாதமோ தற்காலிகக் கட்டண உயர்வு மீட்டுக்கொள்ளப்படும் என்று எதிர்பார்க்கப்பட்டது. ஆனால் தொடர்ந்து எரிபொருள் விலை அதிகமாக இருந்ததால், இம்மாத இறுதிவரை கட்டண உயர்வு தொடரும் என்று கூறப்பட்டது.
தற்காலிகக் கட்டண உயர்வின்கீழ் வழக்கமான டாக்சி சேவைகளை நாடும் பயணிகள் ஒவ்வொரு 400 மீட்டர் தொலைவிற்கும் 25 காசு செலுத்த வேண்டும். இது முதல் பத்து கிலோமீட்டர் தொலைவிற்குப் பொருந்தும். அதன் பிறகு அடுத்த பத்து கிலோமீட்டர் தொலைவிற்கு ஒவ்வொரு 350 மீட்டருக்கும் 25 காசு செலுத்த வேண்டும். காத்திருக்கும் நேரத்தில் ஒவ்வொரு 45 விநாடி அல்லது அதற்குக் குறைவான நேரத்திற்கு 25 காசு செலுத்த வேண்டும்.
கடந்த ஏப்ரல் மாதத்திற்கு முன்னர், இது 24 காசாக இருந்தது.
சொகுசு வாடகை கார்களுக்கு கட்டணத் தொகை மாறுபடும்.
சிங்கப்பூரர்கள் பணவீக்கத்தைச் சமாளிக்க உதவும் நோக்கில் அறிவிக்கப்பட்ட ஒன்றரை பில்லியன் வெள்ளி ஆதரவுத் திட்டத்தின்கீழ், டாக்சியில் பயணம் செய்வோருக்கான வழங்குதொகையும் அடங்கும். அரசாங்கம் தகுதிபெறுவோருக்கு ஒருமுறை மட்டும் அளிக்கப்படும் வழங்குதொகையாக 150 வெள்ளி வழங்கும்.
அடுத்த மாதம் இந்தத் தொகை வழங்கப்படவிருக்கிறது.