மாணவர் முரசு
இ-பேப்பர்
ஆர்ச்சர்ட் சாலையில் 18 ஆண்டுகளாக இயங்கிவரும் 'ஓஜி' சில்லறை வர்த்தக நிறுவனத்தின் 'ஓஜி ஆர்ச்சர்ட் பாயிண்ட்' கடைத்தொகுதி வரும் அக்டோபர் மாதம் மூடப்படவுள்ளது. அதையொட்டி இக்கடையில் கழிவு விலையில் பொருள்கள் விற்கப்படும் என்று 'ஓஜி' தனது ஃபேஸ்புக் பக்கத்தில் நேற்று முன்தினம் அறிவித்திருந்தது.
இதைத் தொடர்ந்து நேற்று 'ஓஜி ஆர்ச்சர்ட் பாயிண்ட்'டிற்கு வாடிக்கையாளர்கள் திரளாகச் சென்றனர். காலை 11 மணிக்குக் கடைத்தொகுதி திறக்கப்படுவதற்கு முன்பு அதன் இரண்டு நுழைவாயில்கள் ஒவ்வொன்றுக்கும் வெளியே சுமார் 50 பேர் வரிசையில் நின்றனர்.
வாடிக்கையாளர்களில் பெரும்பாலோர் கடைத்தொகுதியின் பெண்கள் ஆடைகள் விற்கப்படும் முதல் தளத்திற்கும் வீட்டுக்குத் தேவையான பொருள்கள், மின்சாரப் பொருள்கள் ஆகியவை விற்கப்படும் நான்காம் தளத்திற்கும் சென்றதாகத் தெரிவிக்கப்பட்டது.
'ஓஜி ஆர்ச்சர்ட் பாயிண்ட்' இருக்கும் பகுதியில் இனி காய்கறி, இறைச்சி வகைகள், மளிகைப் பொருள்கள் உள்ளிட்டவற்றை விற்கும் கடை ஒன்று அமையும் என்று தெரிவிக்கப்பட்டுள்ளது.
அக்கடையின் யெரை 'ஓஜி' வெளியிடவில்லை.
ஆகக் கடைசி நிலவரப்படி 'ஓஜி ஆர்ச்சர்ட் பாயிண்ட்'டில் வேலை செய்யும் ஊழியர்களின் நிலை குறித்து அவர்களுக்கு எவ்விதத் தகவலும் அளிக்கப்படவில்லை என்று ஸ்ட்ரெய்ட்ஸ் டைம்சிடம் பேசிய சில ஊழியர்கள் கூறினர்.
'ஆல்பர்ட் பார்க் காம்பிளக்ஸ்' நிலையம், 'பீப்பல்ஸ் பார்க்' ஆகியவற்றிலும் 'ஓஜி' கிளைகளை இயக்குகிறது. 'ஓஜி ஆர்ச்சர்ட் பாயிண்ட்' ஊழியர்கள் அவற்றுக்கு அனுப்பப்படுவர்; ஆனால் விளம்பரப் பணியில் ஈடுபடுவோரின் நிலை என்னவென்று தெரியவில்லை என இங்கு 18 ஆண்டுகளாக வேலை செய்து வரும் ஒரு விளம்பரப் பணியாளர் ஸ்ட்ரெய்ட்ஸ் டைம்சிடம் கூறினார்.
சிங்கப்பூரில் ஏற்கெனவே பிரபல சில்லறை வர்த்தகக் கடைகளான 'ராபின்சன்ஸ்', 'ஈசேட்டான்' ஆகியவை மூடப்பட்டன. 'ராபின்சன்ஸ்' முழுமையாக மூடப்பட்டது. ஜூரோங் ஈஸ்ட், பார்க்வே பரேட் கடைத்தொகுதி ஆகியவற்றில் இருந்த ஜப்பானின் 'ஈசேட்டான்' நிறுவனத்தின் கிளைகள் கடந்த ஈராண்டுகளில் மூடப்பட்டன.