மாணவர் முரசு
இ-பேப்பர்
அனைத்துலகப் பொருளியல் சூழல் அடிப்படையில் மாறிவிட்டது என்றும் அசாதாரணமான காலகட்டம் முடிவுக்கு வந்துவிட்டதால் உலகளவில் செலவினங்களும் பணவீக்கமும் அதிகரித்துள்ளதாக பிரதமர் லீ சியன் லூங் கூறியுள்ளார். இந்தச் சூழலில் சிங்கப்பூரால் அதிக அளவில் தாக்கத்தையே ஏற்படுத்த இயலாது.
ஆனால், கூடுதல் உற்பத்தித்திறனுடனும் போட்டித்தன்மையுடனும் செயல்படுவது சிங்கப்பூரின் ஆற்றலுக்கு உட்பட்டது. அப்போதுதான் ஊழியர்கள் அதிக வருமானம் ஈட்டி உணவு, எரிபொருள், இதர இறக்குமதிகளின் விலை அதிகரிப்பை ஈடுகட்ட முடியும்.
"அந்த வழியில் நாம் அனைவரும் சிறந்த நிலையை எட்ட முடியும்," என்றார் பிரதமர் லீ.
தற்போதைய உலகளாவிய சூழலில் சிங்கப்பூர் எதிர்நோக்கும் பொருளியல் சவால்கள் குறித்தும் பிரதமர் லீ பேசினார். சிங்கப்பூருக்கு உணவு போன்ற இறக்குமதிகளில் ஏற்பட்டுள்ள இடையூறுகளும் அவற்றில் அடங்கும்.
கொவிட்-19 பெருந்தொற்றும் உக்ரேன் போரும் ஒருபுறமிருக்க, வர்த்தகப் பங்காளித்துவ நாடுகளுக்கு இடையே தன்னைப்பேணித்தனம் அதிகரித்து வருவது, சீனாவின் வளர்ச்சி மற்றும் ஏற்றுமதிகள் மெதுவடைவது, நாடுகள் தங்களது விநியோகத் தொடர்களை மறுஆய்வு செய்வது, உற்பத்தியில் நிறுவனங்கள் தங்கள் உத்திகளை மாற்றுவது போன்ற புதிய எதார்த்தங்கள் உலகெங்கும் பணவீக்க அதிகரிப்புக்கு பங்கு வகித்துள்ளன.
சிங்கப்பூரும் அதன் மக்களும் சிறந்து விளங்குவதற்கு பல நிலைகளிலும் முயற்சிகள் எடுக்கப்பட வேண்டும் என்று பிரதமர் லீ கூறினார்.
"பொருளியல் மேம்பாடு மற்றும் மறுசீரமைப்பைத் தொடர்வது, உருமாற்ற முயற்சிகளை இரட்டிப்பாக்குவது, ஒவ்வொரு வாய்ப்பிலும் திறன்களை மேம்படுத்திக்கொள்ள ஊழியர்களுக்கு ஊக்கமளிப்பது போன்றவற்றை நாம் செய்ய வேண்டும். சொல்லப் போனால், நாம் அதைத்தான் செய்கிறோம்," என்றார் அவர்.
விலையுயர்வு ஒருபுறமிருக்க, சிங்கப்பூருக்கு பொருள் விநியோகமும் அண்மைக்காலமாக தடைபட்டுள்ளது என்று பிரதமர் லீ சொன்னார். கோழி ஏற்றுமதிக்கு மலேசியா தடை விதித்துள்ளது, செம்பனை எண்ணெய் ஏற்றுமதியை இந்தோனீசியா நிறுத்தி வைத்து இருப்பது, கோதுமை ஏற்றுமதிக்கு இந்தியா தடை விதித்திருப்பது போன்றவற்றை அவர் சுட்டினார்.
"உணவுப் பற்றாக்குறை, விலையுயர்வு போன்றவற்றால் நெருக்குதலுக்கு உள்ளாகும் அரசாங்கங்கள், தங்களது உள்நாட்டுத் தேவைகளுக்கே முதலிடம் கொடுக்கும். எனவே, இதுபோன்ற கூடுதல் நடவடிக்கைகளை நாம் எதிர்பார்க்க வேண்டும். அவை நம்மைப் பாதிக்கும்," என்று அவர் எச்சரித்தார்.