மாணவர் முரசு
இ-பேப்பர்
பணவீக்கம் உலகமெங்கும் அதிகரிக்கிறது. இருந்தாலும் அது நாட்டுக்கு நாடு வேறுபடுகிறது. சில நாடுகளில் அது ஏறக்குறைய 2 விழுக்காடாக இருக்கிறது. இதர நாடுகளில் 10 விழுக்காட்டுக்கும் மேலாக பணவீக்கம் கூடியுள்ளது.
சிங்கப்பூரில் பணவீக்கம் ஏறக்குறைய 7 விழுக்காடாக உள்ளது. இந்த நிலையில், பிரேசில், பிரிட்டன், நெதர்லாந்து போன்ற நாடுகளில் நிலவும் அளவிற்கு சிங்கப்பூரில் பணவீக்கம் ஈரிலக்க அளவை எட்டாது என்று எதிர்பார்க்கப்படுவதாக ஓசிபிசி வங்கியின் தலைமை பொருளியல் வல்லுநர் செலினா லிங் கூறுகிறார்.
சிங்கப்பூரின் பணவீக்கம் ஈரிலக்க அளவை எட்ட வேண்டுமென்றால் அதற்கு சேவைத் துறையில் கணிசமான பணவீக்க அதிகரிப்பு இருந்தாக வேண்டும் என்று சிஐஎம்பி நிறுவனத்தின் பொருளியல் வல்லுநர் சோங் செங் ஊன் கூறுகிறார்.
பணவீக்க விகிதங்கள் பரந்த அளவில் மாறுபடக்கூடும் என்பதை திரு சோங் சுட்டினார்.
ஒட்டுமொத்த பணவீக்கத்தைக் கணக்கிட பயன்படுத்தப்படும் சரக்கு, சேவைகளின் வகைகள் நாட்டுக்கு நாடு மாறுபடும் என்பதே இதற்கான காரணம் என்று அவர் விளக்கினார்.
பெரிய நாடுகளைப் பொறுத்தவரை நகர பகுதிகளும் கிராமப் பகுதிகளும் இருப்பதால் இது பெரிதும் சாத்தியம் என்றார் அவர்.
இந்தோனீசியாவை எடுத்துக் கொண்டால் பணவீக்கத்தை கணக்கிடக்கூடிய அம்சங்களில் சுமார் 40% உணவுப் பொருள்காக இருக்கும். ஆகையால், உணவுப்பொருள் களின் விலைகள் ஏறினால் அந்த நாட்டின் பணவீக்கமும் கூடும் என்றார் அவர்.
இந்தோனீசியாவின் ஆகப் புதிய பணவீக்க விகிதம் 4.94 விழுக்காடாக இருக்கிறது.
சிங்கப்பூர் போன்ற சிறிய நாடுகளைப் பொறுத்தவரை உணவுப்பொருள்கள், சேவைகளை விட பணவீக்க கணக்கீட்டில் குறைந்த இடத்தையே பிடிக்கின்றன.
சேவைத் துறையைப் பொறுத்தவரை செலவு அதிகரிக்கிறது. ஊழியர் பற்றாக்குறை இருப்பதே அதற்கான காரணம்.
அதோடு மட்டுமின்றி பொருள்களின் அதிக விலை, சேவைத் துறை வழியாகத்தான் பலரையும் சென்றடைகிறது.
வெவ்வேறான பொருள்களும் அரசாங்கம் எப்படி செயல்படுகிறது என்பதும் பணவீக்கத்தில் தாக்கத்தை ஏற்படுத்தும் இதர அம்சங்கள். சிங்கப்பூரில் அரசாங்கம் பொருள், சேவை வரிக் கழிவுகளை வழங்கி இருக்கிறது.
மலேசியாவில் கோழிகள் போன்ற முக்கிய பொருள்களுக்கு விலை வரம்பு நிர்ணயிக்கப்பட்டு இருக்கிறது. ஹாங்காங்கை பொறுத்தவரை அரசாங்கம் தீவிரமாக தலையிட்டு குடும்பங்களுக்கு தள்ளுபடிகளை அல்லது மானியங்களை அளித்து உதவுகிறது.
இதன் காரணமாக ஹாங்காங்கில் பணவீக்கம் 2 விழுக்காடு கூட இல்லை என்றார் திரு சோங்.
பிரிட்டனில் உணவு, குடியிருப்பு, போக்குவரத்து செலவு பணவீக்கத்தில் முக்கிய இடத்தை வகிக்கின்றன. ஆகையால், அங்கு பணவீக்கம் 10.1% ஆக இருக்கிறது என்று திருவாட்டி லிங் கூறினார்.