மாணவர் முரசு
இ-பேப்பர்
மத்திய சேமநிதி கணக்குகளுக்கான குறைந்தபட்ச வட்டிவிகிதம் 2023 டிசம்பர் 31வரை நீட்டிக்கப்பட்டுள்ளது. சிறப்பு, மருத்துவக் கணக்கு, ஓய்வுக் கணக்குகளில் உள்ள பணத்திற்குக் குறைந்தபட்சம் 4 விழுக்காடு வட்டி அடுத்த ஆண்டு இறுதிவரை கிடைக்கும் என்று மத்திய சேமநிதிக் கழகமும் வீடமைப்பு வளர்ச்சிக் கழகமும் தெரிவித்துள்ளன.
இந்த வட்டிவிகிதம், இந்த ஆண்டு 31ஆம் தேதியுடன் காலாவதியாக இருந்தது.
55 வயதுக்குக் குறைவான வயதுள்ள மசே நிதி உறுப்பினர்கள் தங்கள் சாதாரணக் கணக்கில் உள்ள மொத்த இருப்பு தொகைக்கு 5 விழுக்காடு வரை வட்டி பெறுவார்கள். சிறப்பு, மருத்துவச் சேமிப்பு கணக்கில் உள்ள பணத்திற்கு ஆண்டுக்கு 5 விழுக்காடு வட்டி உண்டு.
55 வயதுக்கும் அதிக வயதுள்ள உறுப்பினர்களுக்கு அவர்களின் சாதாரண கணக்கில் உள்ள மொத்த இருப்பில் முதல் $30,000க்கு ஆண்டுக்கு 6 விழுக்காடு வட்டி கொடுக்கப்படும். அடுத்த $30,000 தொகைக்கு 5 விழுக்காடு வட்டி வழங்கப்படும். உறுப்பினரின் சாதாரண கணக்கில் உள்ள பணத்திற்குக் கிடைக்கும் கூடுதல் வட்டி அவர்களின் சிறப்பு, ஓய்வு கால கணக்கிற்கு மாற்றப்படும்.