மாணவர் முரசு
இ-பேப்பர்
முகக்கவசங்களை உற்பத்தி செய்த 'ஃபர்ஸ்ட் என்-லேப்' எனும் நிறுவனம் தொலைக்காட்சி நிகழ்ச்சி ஒன்றில் இடம்பெற்றதைத் தொடர்ந்து, சுகாதார அறிவியல் ஆணையம் அதனிடம் நடத்திய விசாரணையில் முகக்கவசங்களைத் தயாரிக்க அந்நிறுவனத்திடம் உரிமம் இல்லை என கண்டறியப்பட்டது.
அந்நிறுவனம் உரிமமின்றி குறைந்தது 431,480 முகக்கவசங்களைத் தயாரித்தது தெரியவந்தது. இந்த மாதம் 23ஆம் தேதி அந்த நிறுவனத்துக்கு $8,000 அபராதம் விதிக்கப்பட்டது.
நீதிமன்றத்தில் அந்நிறுவனத்தைப் பிரதிநிதித்த அதன் இயக்குநர் கோ ஹோங் மெங் (படம்), சுகாதாரப் பொருள்கள் சட்டத்தின்கீழ் சுமத்தப்பட்ட ஒரு குற்றச்சாட்டை ஒப்புக்கொண்டார்.
2020 ஏப்ரல் 6ஆம் தேதி ஃபர்ஸ்ட் என்-லேப் நிறுவனம் அமைக்கப்பட்டது. கொவிட்-19 பெருந்தொற்றின்போது சீனாவிடமிருந்து முகக்கவசங்களைத் தயாரிக்கும் இயந்திரத்தை அந்நிறுவனம் வாங்கியதாக சுகாதார அறிவியல் ஆணையத்தின் வழக்கறிஞர் விஷ்ணு ஆதித்திய நாயுடு நீதிமன்றத்தில் கூறினார்.
2021 மே 18ஆம் தேதி சேனல் 8 ஒளிவழியில் ஃபர்ஸ்ட் என்-லேப் இடம்பெற்றதைத் தொடர்ந்து, அந்நிறுவனம் பற்றி சுகாதார அறிவியல் ஆணையத்தின் மருத்துவச் சாதனங்கள் பிரிவின் கவனத்துக்குக் கொண்டுவரப்பட்டது.
முகக்கவசங்களைத் தயாரிப்பதற்கு அந்நிறுவனத்திடம் உரிமம் இல்லாதது மருத்துவச் சாதனங்கள் பிரிவுக்கு தெரியவந்தது. அந்நிறுவனம் சரியாக பதிலளிக்காததைத் தொடர்ந்து ஆணையத்தின் அமலாக்கப் பிரிவிடம் இதுபற்றி தெரியப்படுத்தப்பட்டது.
கடந்த ஆண்டு ஜூன் 9ஆம் தேதி ஃபர்ஸ்ட் என்-லேப் நிறுவனத்தின் வளாகத்தில் அதிகாரிகள் சோதனை செய்தனர். இதில் மொத்தம் 323,870 முகக்கவசங்கள் பறிமுதல் செய்யப்பட்டன.
2020 அக்டோபர் முதல் கடந்த ஆண்டு ஏப்ரல் வரை உரிமமின்றி முகக்கவசங்களைத் தயாரித்த அந்நிறுவனம், 2020 நவம்பர் 30ஆம் தேதிக்கும் கடந்த ஆண்டு மே 24ஆம் தேதிக்கும் இடைப்பட்ட காலத்தில் 107,610 முகக்கவசங்களை $14,492.90க்கு விற்பனை செய்தது.
தேவையான உரிமத்தைப் பெற ஒருவழியாக ஆணையத்திடம் விண்ணப்பித்த அந்நிறுவனம், கடந்த ஆண்டு செப்டம்பர் 22ஆம் தேதி அதைப் பெற்றது.