மாணவர் முரசு
இ-பேப்பர்
சோடியம் உட்கொள்ளும் அளவைக் குறைக்குமாறு சுகாதார மேம்பாட்டு வாரியம் வலியுறுத்தவுள்ள நிலையில், கிட்டத்தட்ட 150 சமையல் நிறுவனங்கள் குறைந்த சோடியம் கொண்ட உப்புக்கும் சுவைச்சாறுக்கும் (sauce) மாறிவிட்டன.
உடலுக்கு நலம்பயக்கும் குறைந்த சோடிய உப்பைத் தங்களது உணவுவகைகளில் பயன்படுத்தும்படி, உணவகக் குழுமங்களுடனும் உணவுக்கடைகளுடனும் சுகாதார மேம்பாட்டு வாரியம் இணைந்து பணியாற்றும்.
சிங்கப்பூரில் உயர் ரத்த அழுத்தப் பிரச்சினை அதிகரித்துவரும் நிலையில், அதற்குத் தீர்வுகாணும் விதமாக குறைந்த சோடிய உப்பைப் பயன்படுத்த வாரியம் ஊக்குவிக்கிறது.
மிகுந்த அளவில் சோடியம் எடுத்துக்கொள்வது உயர் ரத்த அழுத்தப் பிரச்சினையை ஏற்படுத்தி, மாரடைப்புக்கும் பக்கவாதத்திற்கும் இட்டுச் செல்லும் என்று ஆய்வுகள் காட்டுகின்றன.
வாரியத்தின் ஆரோக்கிய உணவுத் திட்டத்தின்கீழ் கடந்த ஆண்டில் இருந்தே குறைந்த சோடிய உப்பைப் பயன்படுத்தி வருகிறது 'எல்பிஎச் கேட்டரிங் நிறுவனம்.'
இந்த மாற்றம் முற்றிலும் இனிமையான அனுபவமாக இருப்பதாக அந்நிறுவனம் குறிப்பிட்டது.
"உண்மையிலேயே நாங்கள் சமையல் முறைகளில் மாற்றம் செய்யத் தேவை ஏற்படவில்லை," என்றார் அந்நிறுவனத்தின் தலைமை மேலாளர் ஷோன் லீ. குறைந்த சோடிய உப்பைச் சேர்ப்பதால் சுவையில் எந்த மாற்றமும் இல்லை என்றும் அவர் சொன்னார்.
குறைந்த சோடிய உப்புக்கு மாறியபின் தங்கள் வாடிக்கையாளர்களும் சுவையில் எந்த மாற்றத்தை உணரவில்லை என்றும் எதிர்மறையான கருத்துகள் எதுவும் வரவில்லை என்றும் அவர் கூறினார்.
கடந்த ஆண்டு தேசிய போக்குவரத்து ஊழியர் தொழிற்சங்க உணவகங்களும் உணவு சேவைகள் நிறுவனமான சோடெக்சோவும் இடம்பெற்ற நான்கு வார முன்னோடிச் சோதனையில், வழக்கமான உப்பையும் சுவைச்சாறுகளையும் கொண்டு சமைத்த உணவுவகைகளிலும் குறைந்த சோடிய மாற்றுப்பொருள்களைக் கொண்டு சமைத்த உணவுவகைகளிலும் சுவையில் எந்த மாற்றத்தையும் உணரவில்லை என்று 83 விழுக்காட்டினர் தெரிவித்ததை வாரியம் கண்டறிந்தது.
உணவு சமைப்பதற்கான செலவிலும் மிகச் சிறிய மாற்றமே இருந்தது. குறைந்த சோடியம் கொண்ட உணவைச் சமைக்க 0.1 காசே கூடுதலாகச் செலவானது. அந்த உணவில் கிட்டத்தட்ட 450 மில்லிகிராம் சோடியம் குறைவாக இருந்தது.
வழக்கமான உப்பைவிட கிட்டத்தட்ட 30% குறைவாக சோடியம் இருக்கும் பொட்டாசியம் குளோரைடு, பெரும்பாலும் குறைந்த சோடிய மாற்றுப்பொருளாகப் பயன்படுத்தப்படுகிறது.
ஏறத்தாழ 12 ஆண்டுகளுக்குமுன் தமக்கு உயர் ரத்த அழுத்தம் இருப்பது கண்டுபிடிக்கப்பட்டதை அடுத்து, தமது சொந்த சமையலறையில் குறைந்த சோடிய உப்பையும் சுவைச்சாறுகளையும் பயன்படுத்துவதாகக் கூறினார் திரு சம்சுதீன் சமன், 55.
கடந்த 20 ஆண்டுகளுக்கும் மேலாகக் குறைந்த சோடிய உப்பை விற்று வருகிறது 'ஐஎம்ஐ லைஃப்ஸ்டைல் புராடக்ட்ஸ்' நிறுவனம். இந்நிலையில், குறைந்த சோடியம் உள்ள உப்பைப் பயன்படுத்தும்படி ஊக்குவிக்கப்படுவதால் அத்தகைய பொருள்களுக்கு அதிக தேவை ஏற்படும் என்று அதன் நிர்வாக இயக்குநர் கோ சியூ செங் நம்பிக்கை தெரிவித்தார்.