மாணவர் முரசு
இ-பேப்பர்
வீடமைப்பு வளர்ச்சிக் கழகம், தனியார் அடுக்குமாடி வீடுகளுக்கான வாடகை சென்ற மாதமும் கூடியது.
வாடகைச் சந்தை வேகத்தை மட்டுப்படுத்த மேலும் நெருக்குதல் களை நடைமுறைப்படுத்தலாம் என்று பகுப்பாய்வாளர்கள் கூறுகிறார்கள்.
வீவக வீட்டு வாடகை, செப்டம்பரில் 3.2% கூடியது. இந்த அதிகரிப்பு ஆகஸ்ட்டில் 2.4%ஆக இருந்தது.
முதிர்ச்சி அடைந்த, முதிர்ச்சிஅடையாத பேட்டைகளில் எல்லா வகை வீடுகளுக்குமான வாடகை உயர்ந்து இருப்பதாக 99.co, எஸ்ஆர்எக்ஸ் சொத்துச் சந்தை இணையத்தளங்கள் மூலம் தெரியவந்து இருக்கிறது.
கூட்டுரிமை அடுக்குமாடி வீடுகளின் வாடகை சென்ற மாதம் 3.3% உயர்ந்தது.
இந்த அதிகரிப்பு அதற்கு முந்திய மாதம் 3.2% ஆக இருந்தது.
நகர விளிம்புப் பகுதிகளில் இருக்கும் இத்தகைய வீடுகளுக்கான வாடகை 3.9% கூடி இருக்கிறது.
சென்ற மாதத்தையும் கணக்கில் எடுத்துக்கொண்டு பார்க்கையில் வீவக வீட்டு வாடகை தொடர்ந்து 27வது மாதமாக அதிகரித்து வந்திருக்கிறது.
அதேபோல, தனியார் வீட்டு வாடகை தொடர்ந்து 21 மாதமாக உயர்ந்து வந்துள்ளது.
இதனிடையே, இந்தச் சந்தை நிலவரம் பற்றி கருத்துக் கூறிய ஆரஞ்ச்டீ & டை நிறுவனத்தின் ஆய்வு பகுப்பாய்வுப் பிரிவின் மூத்த துணைத் தலைவர் கிறிஸ்டியன் சன், வாடகை கூடினாலும் தேவை தொடர்ந்து வலுவாகவே இருந்து வருகிறது என்று கூறினார்.
வீட்டை வாடகைக்கு விடு வோருக்கு இது நல்ல காலம் என்று அவர் குறிப்பிட்டார். முன்னிலும் குறைவாக வீடுகளே கிடைப்பதால், அதிக வாடகையைக் கொடுத்துவிட்டு குடியிருக்க பலரும் முடிவு செய்கிறார்கள்.
பழைய வீடுகளாக இருந்தாலும் தொலைதூர வீடுகளாக இருந்தாலும் உடனடியாக நல்ல வாடகையில் எடுத்துக் கொள்ளப்படுகின்றன என்று அந்த மாது விளக்கினார்.
ஆண்டுக்காண்டு அடிப்படையில் பார்க்கையில், தனியார் வீட்டு வாடகை இந்த ஆண்டு செப்டம்பரில் 30.9% கூடியிருக்கிறது. நகர விளிம்புப் பகுதிகளில் இருக்கும் வீடுகளுக்கான வாடகை 31.8% அதிகரித்து உள்ளது.
அதேபோல, வீவக வாடகை வீடுகளைப் பார்க்கையில், அவற்றுக்கான வாடகை சென்ற ஆண்டு செப்டம்பருடன் ஒப்பிடுகையில், இந்த ஆண்டு 24.7% கூடி இருக்கிறது. ஐந்தறை வீட்டு வாடகை 27.9% அதிகரித்துள்ளது.
இது ஒருபுறம் இருக்க, வாடகைக்கு எடுத்துக்கொள்ளப்பட்ட தனியார் வீடுகளின் எண்ணிக்கையும் சென்ற மாதம் ஏறக்குறைய 9.8% கூடி 4,760 வீடுகளாக இருந்தன.
அதேபோல, வாடகைக்கு எடுத்துக்கொள்ளப்பட்ட வீவக வீடுகளின் எண்ணிக்கையில் சென்ற மாதம் 0.3% அதிகரிப்பு காணப்பட்டது.
வாடகைக்குப் பெறப்பட்ட வீவக வீடுகளின் எண்ணிக்கை 1,809 என்பது தெரியவந்தது.
ஆண்டுக்காண்டு அடிப்படையில் வாடகைக்கு எடுத்துக்கொள்ளப்பட்ட வீவக வீடுகளின் எண்ணிக்கை இந்த ஆண்டு செப்டம்பரில் 5.1% கூடி இருக்கிறது.