மாணவர் முரசு
இ-பேப்பர்
மோட்டார்சைக்கிள்களுக்கான வாகன உரிமைச் சான்றிதழ் (சிஓஇ) கட்டணங்கள், மீண்டும் புதிய உச்சத்தைத் தொட்டுள்ளன. ஆக அண்மைய ஏலக் குத்தகை நேற்று முடிவடைந்ததில் அனைத்து வாகனப் பிரிவுகளிலும் சிஓஇ கட்டணங்கள் அதிகரித்திருந்தன.
மோட்டார்சைக்கிள்களுக்கான சிஓஇ $12,801 எனப் பதிவானது. ஆக மலிவான விலையில் கிடைக்கக்கூடிய ஒரு மோட்டார்சைக்கிளைக் காட்டிலும் மும்மடங்காக இந்த சிஓஇ கட்டணம் பதிவாகி உள்ளது.
1,600 சிசி வரையிலான என்ஜின் கொள்ளளவுடைய கார்கள், 110 கிலோவாட் வரையிலான மின்சக்தியுடைய முழு மின்சார கார்கள் ஆகியவை அடங்கிய கார் பிரிவின் சிஓஇ கட்டணம் $80,501 லிருந்து $81,089க்கு அதிகரித்து உள்ளது.
பெரிய, அதிக ஆற்றலுடைய கார்கள் மற்றும் மின்சார வாகனங்களுக்கான சிஓஇ கட்டணம் $95,856 லிருந்து 14.8% அதிகரித்து $110,000ல் முடிவடைந்தது.
முந்தைய ஏலக் குத்தகையில் மோட்டார்சைக்கிள் சிஓஇ கட்டணம் $11,751 எனப் பதிவானதை அடுத்து ஆக அண்மைய ஏலக் குத்தகையில் 8.9% ஏற்றம் கண்டுள்ளது.
வர்த்தக வாகனங்களுக்கான சிஓஇ கட்டணமும் $65,991 லிருந்து 6.4% அதிகரித்து $70,201 எனப் பதிவாகியுள்ளது.
மோட்டார்சைக்கிள்களைத் தவிர மற்ற அனைத்து வகை வாகனங்களையும் பதிவு செய்வதற்கான பொதுப் பிரிவு வாகன சிஓஇ கட்டணமும் 2.9% அதிகரித்து $108,003ஆகப் பதிவானது.
கடந்த இரு ஏலக் குத்தகைகளில் பெரும்பாலான வாகனப் பிரிவுகளில் சிஓஇ கட்டணங்கள் சரிந்து வந்ததை அடுத்து நேற்றைய ஏலக் குத்தகையில் அவை மீண்டும் ஏற்றம் கண்டுள்ளன.
சிஓஇ எண்ணிக்கை 13.8% குறைக்கப்படுவதற்கு முன்னதாக நடந்த ஆக இறுதி ஏலக் குத்தகை இது.