மாணவர் முரசு
இ-பேப்பர்
சைக்கிள் அண்ட் கேரேஜ் சிங்கப்பூர் நிறுவனம் தனது நான்கு சொத்துகளை எம்அண்ட்ஜி சொத்து நிறுவனத்துக்கு விற்றுள்ளதாக தகவல் வெளியாகியுள்ளது. இதற்கு எவ்வளவு தொகை கைமாறியது என்பது குறித்து விவரமில்லை. மெர்சிடிஸ்-பென்ஸ் நிலையத்தையும் அலெக்சாண்டிராவில் உள்ள ஜேர்டின் சைக்கிள் அண்ட் கேரேஜ் தலைமையகத்தையும் உள்ளடக்கிய நான்கு சொத்துகளும் ஆண்டுக்கு 26 மில்லியன் வெள்ளிக்கு குத்தகைக்கு விடப்பட்டுள்ளதாக விவரமறிந்த வட்டாரங்கள் தெரிவிக்கின்றன. எண் 209 பாண்டான் கார்டன்சில் உள்ள மெர்சிடிஸ்-பென்ஸ் வர்த்தகக் காட்சியகம், எண் 188 பாண்டான் லூப்பில் உள்ள பயணிகள் மற்றும் கனரக வாகனங்களுக்கான மெர்சிடிஸ்-பென்ஸ் சேவை நிலையமும் இதர இரண்டு சொத்துகளாகும். இது பற்றி விளக்கம் கேட்டபோது, "எங்களுடைய மூலதனத்தை மேம்படுத்தும் தொடர்ச்சியான நடவடிக்கைகளில் வாய்ப்புகளை ஆராய்ந்து வருகிறோம்," என்று சைக்கிள் அண்ட் கேரியஜ் நிறுவனத்தின் பேச்சாளர் ஒருவர் தெரிவித்தார்.
ஒழுங்குமுறை அமைப்புகளின் ஒப்புதலுடன் நிபந்தனையுடன்கூடிய விற்பனை மற்றும் குத்தகை ஏற்பாட்டை சைக்கிள் அண்ட் கேரேஜ் சிங்கப்பூர் நிறுவனம் செய்துகொண்டதாகவும் அவர் சொன்னார்.
"இந்த ஏற்பட்டால் சிங்கப்பூரில் உள்ள நடவடிக்கைகளில் மாற்றமிருக்காது. சிங்கப்பூரில் எங்களுடைய மோட்டார் வாகனத் தொழில் நன்கு வேரூன்றி உள்ளது.
"வாடிக்கையாளர்கள் மற்றும் பங்காளிகளுடனான எங்களுடைய உறவு நீண்டகாலம் நீடிக்கிறது.
"எங்களுடைய செயல்பாடுகள், எங்களுடைய கொள்கைகள், வாடிக்கையாளர்கள், எங்களுடைய தொழிலாளர்கள் ஆகியவற்றில் இங்கும் இவ்வட்டாரத்திலும் கடப்பாட்டுடன் இருக்கிறோம்," என்றார் அவர்.
சைக்கிள் அண்ட் கேரேஜ் சிங்கப்பூர், சிங்கப்பூர் பங்குச் சந்தையில் பட்டியலிடப்பட்ட முதலீட்டு நிறுவனமான ஜேர்டின் சைக்கிள் அண்ட் கேரேஜ் நிறுவனத்துக்குச் சொந்தமானது.
சைக்கிள் அண்ட் கேரேஜ் சிங்கப்பூர் நிறுவனத்திடமுள்ள குறிப்பிட்ட சொத்துகளை வாங்குவது குறித்து பேச்சு நடைபெற்று வருவதை ஸ்ட்ரெயிட்ஸ் டைம்சிடம் எம்அண்ட்ஜி நிறுவனம் உறுதி செய்துள்ளது. இதற்கிடையே முன்பு டைம்லெர் சவுத்-ஈஸ்ட் ஏசியா என்று அழைக்கப்பட்ட ஜெர்மானிய கார் தயாரிப்பு நிறுவனமான மெர்சிடிஸ்-பென்ஸ் சிங்கப்பூர், விற்பனை குறித்து அறிந்திருப்பதாக தெரிவித்துள்ளது. "எங்களுடைய விற்பனை முனையங்களுடன் தொடர்புடைய சைக்கிள் அண்ட் கேரேஜ் சிங்கப்பூர் சொத்துகளின் உத்தேச விற்பனையை அறிந்துள்ளோம். எங்களுடைய நடவடிக்கைகளை இது பாதிக்காது," என்று மெர்சிடிஸ்-பென்ஸ் சிங்கப்பூர் பேச்சாளர் ஒருவர் தெரிவித்தார்.