மாணவர் முரசு
இ-பேப்பர்
உலகக் கிண்ணக் காற்பந்துப் போட்டியின் 64 ஆட்டங்களையும் சிங்கப்பூரில் நேரடியாக ஒளிபரப்ப சிங்டெல், ஸ்டார்ஹப், மீடியாகார்ப் நிறுவனங்கள் ஆகியவை மூவழி ஒப்பந்தம் ஒன்றை அறிவித்துள்ளன. அதன்படி நவம்பர் 6க்கு முன்பாக நேரடி ஒளிபரப்புச் சேவைக்குப் பதிவு செய்வோர் $98 சிறப்பு விலையில் அச்சேவையைப் பெறலாம்.
உலகக் கிண்ணக் காற்பந்துப் போட்டி வரும் நவம்பர் மாதம் 20ஆம் தேதி முதல் டிசம்பர் 21 வரை கத்தாரில் நடைபெறும்.
சிங்டெல், ஸ்டார்ஹப் வாடிக்கையாளர்கள் உலகக் கிண்ண சேவையை $98க்குப் பெறலாம். நவம்பர் 6க்குப் பிறகு கட்டணம் $118ஆக உயரும்.
நான்கு ஆண்டுகளுக்கு முன்பு நடைபெற்ற உலகக் கிண்ணக் காற்பந்துப் போட்டியின் நேரடி ஒளிபரப்புக்கான கட்டணம் $94 ஆக இருந்தது (சலுகை காலத்திற்குப் பிறகு $112). உலகக் கிண்ணத்துடன் இரண்டு ஆண்டுகள் சிறப்பு ஒப்பந்த சேவையையும் சிங்டெல், ஸ்டார்ஹப் நிறுவனங்கள் வழங்குகின்றன.
மீடியாகார்ப் நிறுவனம் நான்கு ஆண்டுகளுக்கு முன்பு போலவே ஒன்பது ஆட்டங்களை நேரடியாக ஒளிபரப்பும்.
உலகக் கிண்ணக் காற்பந்துப் போட்டியின் தொடக்க ஆட்டம், ஐந்து குழுப் பிரிவு ஆட்டங்கள், இரு அரை இறுதி ஆட்டங்கள் ஆகியவற்றுடன் இறுதி ஆட்டமும் இலவசமாக ஒளிபரப்பப்படும்.
மீடியாகார்ப் நிறுவனத்தின் மீவாட்ச் செயலியில் அனைத்து ஆட்டங்களையும் காண ரசிகர்கள் அதே $98 கட்டணம் செலுத்தவேண்டும்.
இந்த ஆண்டு உலகக் கிண்ண ஒளிபரப்புக்கான கட்டணங்களை அறிவிப்பதில் தாமதம் ஏற்பட்டதைத் தொடர்ந்து ரசிகர்கள் அதிருப்தியை தெரிவித்து வந்துள்ளனர்.
உலகக் கிண்ண நேரடி ஒளிபரப்புக் கட்டணங்கள் பற்றிய மேல் விவரங்களுக்கு www.starhub.com/fifaworldcup, www.singtel.com/worldcup அல்லது www.mewatch.sg/fifaworldcup இணையத்தளங்களை நாடலாம்.