மாணவர் முரசு
இ-பேப்பர்
ஆசியான் தற்காப்பு அமைச்சர்கள் ஓய்விட சந்திப்பிலும் சாதாரண நிலை சந்திப்பிலும் பலதரப்பு ஒத்துழைப்பை சிங்கப்பூர் மறுஉறுதிப்படுத்தியது.
கம்போடியாவின் சியாம் ரீப் நகரில் அமெரிக்கா, இந்தியாவுடன் கூடிய அந்தக் கூட்டங்களில் தற்காப்பு அமைச்சர் டாக்டர் இங் எங் ஹென் கலந்துகொண்டார்.
ஓய்விட சந்திப்பில் ஆசியான் தற்காப்பு அமைச்சர்கள் கூட்ட ஏற்பாட்டின் (ஏடிஎம்எம்) முன்னேற்றம் பற்றி அமைச்சர்கள் விவாதித்தனர்.
வட்டார, உலக, பாதுகாப்புச் சூழல் பற்றியும் ஏடிஎம்எம் ஏற்பாடு, ஏடிஎம்எம்- இதர நாடுகள் (ஏடிஎம்எம்-பிளஸ்) ஏற்பாடு ஆகியவற்றுக்கான எதிர்கால ஒத்துழைப்புத் துறைகள் பற்றியும் அவர்கள் கருத்துகளைப் பகிர்ந்துகொண்டதாக தற்காப்பு அமைச்சு தெரிவித்தது.
ஏடிஎம்எம்-பிளஸ் கண்காணிப்பு செயல்திட்ட வல்லுநர்கள் பணிக்குழுவில் கனடா, பிரான்ஸ், பிரிட்டன் ஆகியவற்றின் ஈடுபாட்டை ஆசியான் தற்காப்பு அமைச்சர்கள் அங்கீகரித்தனர்.
இந்தோனீசியாவின் தலைமைத்துவத்தின் கீழ் அடுத்த ஆண்டு அந்தச் செய்லதிட்டம் தொடங்குவதையும் அவர்கள் வரவேற்றனர்.
அமைதியையும் நிலைப்பாட்டையும் கட்டிக்காக்கக்கூடிய, எல்லாரையும் உள்ளடக்கிய, திறந்த வட்டாரப் பாதுகாப்பு ஏற்பாட்டின் முக்கியத்துவத்தை டாக்டர் இங் வலியுறுத்தினார்.
ஆசியான்-அமெரிக்கா தற்காப்பு அமைச்சர்களின் சாதாரண நிலை கூட்டத்தில் ஆசியான் தற்காப்பு அமைச்சர்களும் அமெரிக்காவின் தற்காப்பு அமைச்சரும் ஒத்துழைப்பைப் பலப்படுத்துவதற்கான வழிகள் பற்றி விவாதித்தனர்.
ஆசியான்-இந்தியா தற்காப்பு அமைச்சர்கள் சாதாரணநிலை சந்திப்பில் ஆசியான் அமைச்சர்களும் இந்தியத் தற்காப்பு அமைச்சரும் அடுத்த ஆண்டு மே மாதம் நடக்க உள்ள ஆசியான்-இந்தியா கடல்துறை பயிற்சியை வரவேற்றனர்.
இது, ஆசியான்-இந்தியா தற்காப்பு அமைச்சர்களின் முதலாவது சதாரணநிலை கூட்டமாகும்.
இப்போதைய ஒத்துழைப்பைப் பலப்படுத்துவதற்கான கருத்துகளைப் பகிர்ந்துகொண்டனர். ஒத்துழைப்புக்கான புதிய துறைகளை அடையாளம் காண்பது பற்றியும் அவர்கள் விவாதித்தனர்.
டாக்டர் இங் கம்போடிய துணைப் பிரதமரும் தேசிய தற்காப்பு அமைச்சருமான டீ பானை சந்தித்தார். அந்தச் சந்திப்பின்போது இருதரப்பு தோழமை தற்காப்பு உறவை இருவரும் மறுஉறுதிப்படுத்தினர். ஆசியானின் ஐக்கியம், நடுநிலை ஆகியவற்றின் முக்கியத்துவத்தையும் அவர்கள் வலியுறுத்தினர்.
டாக்டர் இங் இன்று ஒன்பதாவது ஏடிஎம்எம்-பிளஸ் கூட்டத்தில் கலந்துகொள்வார்.
இந்தக் கூட்டத்தில் ஆசியான் தற்காப்பு அமைச்சர்களும் ஆஸ்திரேலியா, சீனா, இந்தியா, ஜப்பான், நியூசிலாந்து, தென்கொரியா, ரஷ்ய சம்மேளனம், அமெரிக்கா ஆகிய எட்டு பிளஸ் நாடுகளின் தற்காப்பு அமைச்சர்களும் பிரமுகர்களும் கலந்துகொள்வர்.