மாணவர் முரசு
இ-பேப்பர்
அடுத்த மாதம் மூன்றாம் தேதி முதல் 'எஸ்பிஎச் ரீட்' அமைப்பின் பெயர் 'பேரகன் ரீட்' என்று மாற்றம் காணும் என அறிவிக்கப்பட்டுள்ளது. அமைப்பின் எண்ணங்களையும் ஆசிய பசிபிக் வட்டாரத்தில் இருக்கக்கூடிய மாறுபட்ட வாய்ப்புகளைப் பயன்படுத்திக்கொள்ளும் இலக்கையும் நன்கு வெளிப்படுத்த பெயர் மாற்றப்படுவதாக அதன் நிர்வாகி ஒருவர் நேற்று தெரிவித்தார்.
'எஸ்பிஎச் ரீட்'டுக்கு நிதி ஆதரவு வழங்கிவரும் நிறுவனம் கஸ்கேடன் பீக் இன்வெஸ்ட்மென்ட்ஸ். முன்னதாக எஸ்பிஎச் ஹோல்டிங்ஸ் என்று அழைக்கப்பட்ட அது, கஸ்கேடன் பீக் நிறுவனத்துக்குச் சொந்தமானது.
சிங்கப்பூர் செல்வந்தர் ஓங் பெங் செங்கின் ஹோட்டல் சொத்துகள், தெமாசெக் நிறுவனத்துடன் தொடர்புடைய 'சிஎல்ஏ ரியல் எஸ்டேட் ஹோல்டிங்ஸ்', மேப்பல்ட்ரீ ஆகிய நிறுவனங்களை உள்ளடக்கியது கஸ்கேடன் பீக்.
சிங்கப்பூர் பங்குச் சந்தையில் 'எஸ்பிஎச் ரீட்'டின் குறிப்பு எண் SK6U. பெயர் மாற்றத்திற்குப் பிறகும் அந்த எண் மாறாது என்று தெரிவிக்கப்பட்டுள்ளது.
'எஸ்பிஎச் ரீட்'டின் தற்போதைய நிர்வாகக் குழுவே அதைத் தொடர்ந்து நடத்தும்.
'தி கிளமென்டி மால்', 'தி ரெய்ல் மால்', ஆர்ச்சர்ட் சாலையில் உள்ள பேரகன் ஆகிய கடைத்தொகுதிகள் 'எஸ்பிஎச் ரீட்'டின்கீழ் உள்ளன. இவற்றோடு ஆஸ்திரேலியாவில் உள்ள இரண்டு கடைத்தொகுதிகளையும் அது நடத்தி வருகிறது.