ரச்சனா வேலாயுதம்
வாடகை வீடுகளில் வசிக்கின்ற கிட்டத்தட்ட 100 குறைந்த வருமானக் குடும்பங்களுக்கு ஆதரவு அளித்து அவற்றை ஊக்குவிக்க கம்போங்-கெம்பாங் சமூக மன்றத்தில் நேற்று கேளிக்கை நிகழ்ச்சி நடந்தது.
அத்தகைய குடும்பங்களுக்குத் தேவையான பொருள்களும் பற்றுச்சீட்டுகளும் அன்பளிப்பாகக் கொடுக்கப்பட்டன.
'ஹோப் இனிஷியேடிவ் அலெயன்சஸ்' என்ற சமூக அமைப்பின் 'தி அல்ஃபாபட் புரொஜெக்ட்' என்ற செயல்திட்டத்தையொட்டி நடந்த அந்தக் கேளிக்கை நிகழ்ச்சியில் மந்திரக் காட்சி, ஆடல், பாடல், அதிர்ஷ்டக் குலுக்கு போன்ற பலவும் இடம்பெற்றன.
சிறார்கள் பல்வேறு விளையாட்டுகளில் கலந்துகொண்டு தின்பண்டங்களைச் சுவைத்தனர்.
நிகழ்ச்சியில் நாடாளுமன்ற நாயகர் டான் சுவான் ஜின் சிறப்பு விருந்தினராகக் கலந்துகொணடார். "நாம் நம்மை கவனித்துக் கொள்வதோடு நம்மைச் சுற்றி இருப்பவர்களையும் கவனித்துக் கொள்ள வேண்டும்," என்று அவர் வலியுறுத்தினார்.
குறைந்த வருமானக் குடும்பங்களுக்கு கிடைக்கக்கூடிய உதவி களைப் பற்றி அவர்களிடம் எடுத்துச் சொல்லும் தொண்டூழியர்கள் முக்கியமானவர்கள் என்பதையும் அவர் வலியுறுத்தினார்.
இதனிடையே, குறைந்த வருமானக் குடும்பங்களை ஆதரிக்கவும் ஊக்குவிக்கவும் அவர்களோடு சேர்ந்து இந்தப் புத்தாண்டு விழாவுக்கு ஏற்பாடு செய்ததாக ஹோப் இனிஷியேடிவ் அலெயன்சஸ் அமைப்பைச் சேர்ந்த திருமதி நஸ்ஹத் ஃபஹிமா கூறினார்.
டைனோசர் பற்றி சிறுகதை ஒன்றை எழுதி மேடையில் எல்லாருக்கும் படித்துக்காட்டி கைல், 8, என்ற சிறுவன், போட்டியில் முதல் பரிசை வென்றார்.
இது பற்றி கருத்துகூறிய கைலின் தாயார் திருவாட்டி பி. தெரேசா, 2022வது ஆண்டை இனிப்பாக முடித்துவைத்த இந்த விழா, பிள்ளைகளுக்கு மிகவும் உதவி இருப்பதாகக் கூறினார்.