மாணவர் முரசு
இ-பேப்பர்
சிங்கப்பூரின் முக்கிய ஏற்றுமதி சென்ற மாதம் தொடர்ந்து மூன்றாவது மாதமாகக் குறைந்தது. எண்டர்பிரைஸ் சிங்கப்பூர் அமைப்பு நேற்று வெளியிட்ட புள்ளிவிவரங்கள் இதைக் காட்டுகின்றன.
எண்ணெய் சாரா உள்நாட்டு உற்பத்திப் பொருள்களின் ஏற்றுமதி ஓராண்டுக்கு முன்புடன் ஒப்பிடுகையில் 20.6 விழுக்காடு குறைந்தது. முன்னதாக அது 16.8 விழுக்காடு குறையுமென புளூம்பெர்க் முன்னுரைத்திருந்தது. நவம்பர் 2022ல் அது 14.7 விழுக்காடாகப் பதிவானது.
இருப்பினும் சென்ற ஆண்டு முழுமைக்கும் எண்ணெய் சாராப் பொருள்களின் ஏற்றுமதி 3 விழுக்காடு அதிகரித்ததாகக் கூறப்பட்டது. முன்னதாக அது 6 விழுக்காடாக இருக்குமென முன்னுரைக்கப்பட்டிருந்தது.
சென்ற மாதம் மின்னணுப் பொருள்கள், மின்னணு சாராப் பொருள்கள் என இரு பிரிவுகளிலும் ஏற்றுமதியில் ஈரிலக்கக் குறைவு பதிவானது.
மின்னணுப் பொருள்களின் ஏற்றுமதி 17.9 விழுக்காடு குறைந்தது. மின்னணு சாராப் பொருள்களின் ஏற்றுமதி 21.3 விழுக்காடு குறைந்தது.
சிங்கப்பூரின் ஏற்றுமதிப் பட்டியலில் முன்னணி வகிக்கும் பத்து வட்டாரங்களுக்கும் ஏற்றுமதி குறைந்தது. குறிப்பாக சீனா, ஹாங்காங், இந்தோனீசியா ஆகியவற்றுக்கான ஏற்றுமதி 30 முதல் 35 விழுக்காடுவரை சரிந்தது. தென்கொரியா, ஜப்பான் ஆகிய நாடுகளுக்கு ஏற்றுமதி அதிகரித்ததாகக் கூறப்படுகிறது.
ஆண்டு அடிப்படையில், சென்ற மாதத்துக்கான மொத்த வர்த்தகம் 7.7 விழுக்காடு வீழ்ச்சிகண்டது. இருப்பினும் சென்ற ஆண்டு முழுமைக்கும் சிங்கப்பூரின் ஒட்டுமொத்த வர்த்தகம் 17.7 விழுக்காடு வளர்ச்சியடைந்தது. அதன் மதிப்பு $101.3 பில்லியன்.