மாணவர் முரசு
இ-பேப்பர்
சிங்கப்பூரில் ஆக அதிக வளர்ச்சிகாணும் நிறுவனங்களின் பட்டியலில் நிதித் தொழில்நுட்பம், மின்வர்த்தகம், தகவல் தொழில்நுட்பம் போன்ற துறைகளைச் சார்ந்த நிறுவனங்கள் தொடர்ந்து இடம்பெறும் வேளையில், எரிசக்தி, பயனீட்டுத்துறை போன்றவை சார்ந்த நிறுவனங்கள் பட்டியலில் முன்னணி வகிப்பதாகக் கூறப்பட்டுள்ளது.
உலகளாவிய ஆய்வு நிறுவனமான ஸ்டேடிஸ்டாவும் ஸ்ட்ரெய்ட்ஸ் டைம்சும் இணைந்து தொகுத்த அந்தப் பட்டியலில் இங்கு ஆக அதிக வளர்ச்சிகண்ட 100 நிறுவனங்கள் இடம்பெற்றுள்ளன.
நேற்று வெளியான அந்தப் பட்டியலில், உற்பத்தி, போக்குவரத்து, தளவாடத்துறை ஆகியவை சார்ந்த நிறுவனங்கள் கூடுதலான எண்ணிக்கையில் இடம்பிடித்துள்ளன.
பட்டியலில் இடம்பெற, நிறுவனங்களின் தலைமையகம் சிங்கப்பூரில் அமைந்திருக்க வேண்டும். மேலும் 2018ல் இவை குறைந்தது $150,000 வருவாயும் 2021ல் $1.5 மில்லியன் வருவாயும் ஈட்டியிருக்க வேண்டும்.
இந்த ஆண்டுக்கான இப்பட்டியலில் எரிசக்தி, பயனீட்டுத் துறைகள் சார்ந்த ஏழு நிறுவனங்கள் உள்ளன. ஒப்புநோக்க, முந்தைய பட்டியலில் இத்தகைய மூன்று நிறுவனங்களே இடம்பெற்றிருந்தன.
முழுமையான வளர்ச்சி எனும் அடிப்படையில் பட்டியலில் முதலிடம் பிடித்துள்ளது ரெக்ஸ் இன்டர்நேஷனல் எனும் பன்னாட்டு எண்ணெய் நிறுவனம். இது ஓமான், நார்வே, மலேசியா ஆகியவற்றில் உற்பத்தி உரிமங்களைப் பெற்று இயங்கி வருகிறது.
யூனியன் கேஸ், நிலக்கரிச் சுரங்க நடவடிக்கையில் ஈடுபடும் புதிய நிறுவனமான ஜியோ எனர்ஜி ரிசோர்சஸ், பிஎஸ் எனர்ஜி போன்றவையும் பட்டியலில் இடம்பெற்றுள்ளன.
இதில் எட்டு தளவாட, போக்குவரத்து நிறுவனங்கள் இடம்பிடித்துள்ளன. நிதித் தொழில்நுட்பத் துறை சார்ந்த நிறுவனங்களே ஆக அதிக எண்ணிக்கையில் பட்டியலில் இடம்பெற்றுள்ளன. இத்தகைய 10 நிறுவனங்கள் பட்டியலில் இடம்பிடித்துள்ளன.