மாணவர் முரசு
இ-பேப்பர்
அலெக்சாண்டிரா சேமிப்புக் கிடங்கில் கண்ணாடிக் கதவுகளை இறக்கியபோது ஆடவர் மூவர்மீது ஒன்பது கதவுகள் விழுந்ததில் காயமடைந்த 53 வயது சிங்கப்பூரர் சிகிச்சை பலனின்றி உயிரிழந்தார்.
அந்த ஆடவரும் காயமடைந்த மற்றொருவரும் தேசிய பல்கலைக்கழக மருத்துவமனைக்குக் கொண்டு செல்லப்பட்டனர்.
காயமடைந்த மற்றோர் ஆடவரின் ஊழியரின் உடல்நிலை சீராக இருப்பதாகத் தெரிவிக்கப்பட்டது. மூன்றாமவருக்கு எந்த பாதிப்பும் இல்லை.
இதனையடுத்து, இவ்வாண்டில் வேலையிட விபத்தில் மாண்டோர் எண்ணிக்கை நான்காக உயர்ந்துவிட்டது.
விபத்தைத் தொடர்ந்து, சம்பந்தப்பட்ட நிறுவனம் தனது வேலை நடவடிக்கைகளை நிறுத்திவைக்குமாறும் அந்நிறுவனத்தின் வேலை நடைமுறைகளை மறுஆய்வு செய்ய வேலையிடப் பாதுகாப்பு, சுகாதாரத் தணிக்கை அதிகாரி ஒருவரை நியமனம் செய்யுமாறும் அறிவுறுத்தப்பட்டுள்ளது என்று மனிதவள அமைச்சு நேற்று வெளியிட்ட அறிக்கையில் தெரிவித்துள்ளது.
மூன்று மாதங்களுக்கு புதிய வெளிநாட்டு ஊழியர்களை பணியமர்த்துவதற்கு நிறுவனத்திற்கு தடை விதிக்கப்பட்டுள்ளது.
அத்துடன், நிறுவனத்தின் இயக்குநர் பாதுகாப்பு குறைபாடுகள் குறித்து மனிதவள அமைச்சுக்கு தனிப்பட்ட முறையில் அறிக்கை கொடுக்கவேண்டும் என்றும் சரிசெய்வதற்கு நேரடி பொறுப்பை ஏற்க வேண்டும் என்று அந்த அறிக்கையில் தெரிவிக்கப்பட்டுள்ளது.
61, அலெக்சாண்டிரா டெரஸ் ஹார்பர் லிங்க் காம்பிளக்ஸ் எனும் முகவரியில் இம்மாதம் 2ஆம் தேதி பிற்பகல் 2.15 மணியளவில் இவ்விபத்து நிகழ்ந்தாக அமைச்சு கூறியது.
எடுத்துச் செல்லப்படும்போது கொள்கலன்களில் உள்ள கண்ணாடிகள், சட்டங்கள் போன்றவை மரப் பெட்டிகளுக்குள் நிமிர்ந்த நிலையில் அடுக்கப்பட்டிருக்க வேண்டும். ஃபோர்க்லிஃப்ட்ஸ் போன்றவற்றைப் பயன்படுத்தி பாதுகாப்பான முறையில் இறக்க வேண்டும். பொருட்களை கைமுறையாக மாற்ற வேண்டும் என்றால், கொள்கலனில் உள்ள மற்ற பொருட்கள் கவிழ்வதைத் தடுக்க, முட்டுகள் அல்லது பாதுகாப்புப் பட்டைகள் போன்றவற்றைப் பயன்படுத்த வேண்டும் என்றும் அறிக்கை குறிப்பிட்டது.
விபத்து குறித்து அமைச்சு விசாரித்து வருகிறது.
கட்டடத்தில் செயல்படும் பிபிடி இன்ஜினியரிங் நிறுவனத்தின் செய்தித் தொடர்பாளர், விசாரணையில் நிறுவனம் முழுமையாக ஒத்துழைக்கும் என்றார்.
பாதிக்கப்பட்டவரின் குடும்பத்தினருக்கு நிறுவனம் அனுதாபம் தெரிவிப்பதாகவும், அவர்களுக்கு அதிகபட்ச ஆதரவை வழங்க உறுதிபூண்டுள்ளதாகவும் அவர் கூறினார்.
2022ல் 46 பணியிட உயிரிழப்புகள் பதிவாகின. 2016ன் 66 உயிரிழப்புகளுக்குப் பிறகான அதிகபட்ச எண்ணிக்கை இது.