மாணவர் முரசு
இ-பேப்பர்
டோவர் கிரசெண்ட், ஃபேரர் பார்க்கில் அதிக நிபந்தனைகளுடன்கூடிய வீடுகள்
வீடமைப்பு வளர்ச்சிக் கழகம் நேற்று 4,428 பிடிஓ வீடுகளை விற்பனைக்கு விட்டது. அவற்றில் டோவர் கிரசெண்ட், ஃபேரர் பார்க்கில் உள்ள இரண்டு பிரதான இட பொது வீடமைப்புத் திட்டத்தின்கீழ் (பிஎல்ஹெச்) கட்டப்படும் வீடுகளும் அடங்கும்.
அந்த இரண்டு திட்டங்களில் ஒன்று முதிர்ச்சியடைந்த குவீன்ஸ்டவுன் குடியிருப்புப் பேட்டையிலும் மற்றொன்று காலாங்/வாம்போ குடியிருப்புப் பேட்டையிலும் இடம்பெறுகின்றன.
இந்தத் திட்ட வீடுகளை வாங்கவும் விற்கவும் கடுமையான நிபந்தனைகளை நிறைவேற்ற வேண்டும். இவற்றை விற்கும்போது 6% மானியத் ெதாகையைத் திருப்பிக் கழகத்திடம் கொடுத்துவிட வேண்டும்.
நேற்று தொடங்கிய இந்த ஆண்டின் முதல் வீட்டு விற்பனையில் இதர மூன்று திட்ட வீடுகளும் இடம்பெறுகின்றன.
அவற்றில் ஒன்று காலாங்/வாம்போவில் இடம்பெறுகிறது. இது பிஎல்ஹெச் திட்டத்தின்கீழ் வராது. ஜூரோங் வெஸ்ட், தெங்கா ஆகிய இதர இரண்டு புதிய பேட்டைகளில் மற்ற இரண்டு திட்ட வீடுகளும் கட்டப்படும்.
மொத்தம் ஐந்து திட்டங்களில் கட்டப்படும் புதிய வீடுகளுக்குச் சராசரியாக 4.4 ஆண்டுகள் காத்திருக்க வேண்டும்.
ஜூரோங் வெஸ்ட், தெங்காவில் கட்டிக் கொடுக்கப்படும் நாலறை வீடுகள் அனைத்தும் மானியம் சேராமல் $400,000 விலைக்குக் கீழ் இருக்கும் என்று வீவக தெரிவித்து இருக்கிறது.
குவீன்ஸ்டவுனில் உலு பாண்டான் கிளேட்சில் மொத்தம் 732 மூவறை, நாலறை வீடுகள் கட்டப்படும். இவற்றில் மூவறை வீட்டின் விலை மானியமின்றி $372,000 முதல் $498,000 வரை இருக்கும்.
நாலறை வீட்டின் விலை $541,000 முதல் $711,000 வரை இருக்கும். இந்த வீடுகளே நேற்று விற்பனைக்கு வந்த வீடுகளில் ஆக அதிக விலையுள்ள வீடுகள். இவற்றைப் பெற 68 மாதங்கள் காத்திருக்க வேண்டும்.
நேற்று விற்பனைக்கு வந்த இரண்டாவது பிஎல்ஹெச் திட்ட வீடுகள் ஃபேரர் பார்க் ஃபீல்ட்ஸில் கட்டப்படும். இந்தத் திட்டத்தில் 1,274 ஈரறை நீக்குப்போக்கு, மூவறை, நாலறை வீடுகள் இடம்பெற்று இருக்கும்.
லிட்டில் இந்தியாவுக்கும் ஃபேரர் பார்க் எம்ஆர்டி நிலையத்திற்கும் இடையில் உள்ள ஒரு நிலப் பகுதியில் இந்த வீடுகள் எழும். இவற்றில் மூவறை வீட்டின் விலை $356,000 முதல் $449,000 வரை இருக்கும். நாலறை வீட்டின் விலை $484,000 முதல் $631,000 வரை இருக்கும். இந்த வீடுகளுக்குச் சுமார் 53 மாதங்கள் காத்திருக்க வேண்டும்.
காலாங்/வாம்போவில் கட்டப்படும் இதர பிடிஓ திட்டத்தில் 510 மூவறை, நாலறை வீடுகள் இடம்பெற்று இருக்கும். இவை காலாங் ஆற்றுக்குப் பக்கத்தில் ஜாலான் ராஜாவில் உள்ள ஓர் இடத்தில் கட்டப்படும்.
விலைகள் மூவறை வீட்டிற்கு $326,000 முதல் $443,000 வரையும் நாலறை வீட்டிற்கு $459,000 முதல் $631,000 வரை இருக்கும். இவற்றுக்கு 58 மாதங்கள் காத்திருக்க வேண்டும்.
தெங்கா, ஜூரோங் வெஸ்ட்டில் கட்டப்படும் நாலறை அதற்கும் பெரிய பிடிஓ வீடுகளில் குறைந்தபட்சம் 95% வீடுகளும் மூவறை வீடுகளில் குறைந்தபட்சம் 85% வீடுகளும் முதல்முறை வீட்டை வாங்கும் குடும்பங்களுக்காக ஒதுக்கப்படும்.
இவற்றைப் பெற நான்கு ஆண்டுகளுக்கும் குறைவான காலமே காத்திருந்தால் போதும். தெங்காவில் 1,641 வீடுகளும் ஜூரோங் வெஸ்ட்டில் 271 வீடுகளும் கட்டப்படுகின்றன.
நேற்று விற்பனைக்கு வந்த வீடுகளுக்கான விண்ணப்பங்கள் வீவக வீட்டு இணையவாயிலில் மார்ச் 6ஆம் தேதி இரவு 11.59 மணிக்குள் தாக்கலாக வேண்டும். சீட்டு குலுக்கல் மூலம் வீடுகள் ஒதுக்கப்படும்.