பிப்ரவரியில் சாதனை அளவு மழை; இந்த மாதமும் மழை தொடரும்

2 Mar 2023 05:30

சிங்கப்பூரின் கிழக்கு மற்றும் தெற்கு வட்டாரங்களில் நேற்று முன்தினம் பெய்த மழை மிகவும் கடுமையானது என்று தெரிய வந்துள்ளது.

மேலும், காலாங்கில் பதிவான அன்றாட மொத்த மழை அளவு 225.5 மில்லிமீட்டர் என்று பதிவானது.

இது பிப்ரவரி மாதத்தில் பெய்த ஆக அதிக மழை அளவு என கணக்கிடப்பட்டு உள்ளது.

இதற்கு முன்னர் 1995ஆம் ஆண்டு பிப்ரவரி 4ஆம் தேதி 159.3 மில்லிமீட்டர் பதிவானதே ஆக அதிக பிப்ரவரி மாத மழையாக இருந்து வந்தது.

தென்சீனக் கடலில் உருவான குளிர்ந்த வெப்பநிலையால் தீவின் மழைப்பிடிப்பு பகுதிகளில் 100 மில்லிமீட்டருக்கும் மேல் மழை பெய்தது.

அத்துடன் தீவு முழுவதும் குளிர் வெப்பநிலை உருவானது. சிங்கப்பூரின் மத்திய வட்டாரத்தில் நேற்றுக் காலை 21.1 டிகிரி சென்டிகிரேட் என்று குளிர்ந்த வெப்பநிலை பதிவானது.

தீவின் இதர பகுதிகளிலும் கிட்டத்தட்ட 21.7 டிகிரி சென்டிகிரேடுக்கும் 23.1 டிகிரி சென்டிகிரேடுக்கும் இடையில் குளிர்ந்த வெப்பநிலை பதிவானது.

பிப்ரவரி மாதத்தின் இரண்டாம் பாதியில் பெரும்பாலும் வறண்ட நிலை இருந்தபோதிலும் ஒட்டுமொத்தமாகக் கணக்கிடுகையில் அந்த மாதத்தின் சராசரி அளவைக் காட்டிலும் கூடுதலாக மழை பெய்ததாக சிங்கப்பூர் வானிலை ஆய்வு சேவை நிலையம் நேற்று தெரிவித்தது.

குறிப்பாக, தஞ்சோங் காத்தோங் வட்டாரத்தில் வழக்கத்திற்கு மாறாக, சராசரி அளவைக் காட்டிலும் 281 விழுக்காடு அதிகமாக மழை பெய்தது.

வடகிழக்குப் பருவநிலை

பிப்ரவரி மாதம் சிங்கப்பூரிலும் சுற்றுவட்டாரத்திலும் நீடித்ததன் காரணமாக மழை அளவு கூடியது.

இதே நிலவரம் இந்த (மார்ச்) மாதத்தின் முதல் வாரத்திலும் நீடிக்கும் என்று எதிர்பார்க்கப்

படுகிறது.

பெரும்பாலான நாள்களில், பிற்பகலில் இடியுடன் கூடிய மழையை எதிர்பார்க்கலாம் என்று நிலையம் நேற்று தனது அறிக்கையில் குறிப்பிட்டது. சில நாள்களில் மாலைநேரம் வரைகூட மழை நீடிக்கக்கூடும் என்றது அந்த நிலையம்.

இருப்பினும் இந்த மாதத்தின் பிற்பாதியில் கிட்டத்தட்ட வறண்ட நிலை ஏற்படுவதற்கான சாத்தியம் இருப்பதாகவும் அறிக்கையில் தெரிவிக்கப்பட்டுள்ளது.

“மார்ச் மாதத்தின் முதல் பாதியில் சிங்கப்பூரின் பெரும்பாலான பகுதிகளில் சராசரி அளவைக் காட்டிலும் அதிக மழை பெய்யும் என்று முன்னுரைக்கப்படுகிறது,” என்று ஆய்வு நிலையம் கூறி உள்ளது.

அதற்கேற்ப அன்றாட வெப்பநிலை 24 டிகிரி சென்டிகிரேடுக்கும் 33 டிகிரி சென்டிகிரேடுக்கும் இடைப்பட்டு இருக்கும் என்றும் மேகமூட்டம் குறைந்த நாள்களில் இது 34 டிகிரி சென்டிகிரேட் வரை தொடக்கூடும் என்றும் அது மேலும் தெரிவித்துள்ளது.