உலகின் ஆகச் சிறந்த விமான நிலையமாக சாங்கி விமான நிலையம் மீண்டும் அறிவிக்கப்பட்டு உள்ளது.
லண்டனைத் தளமாகக் கொண்டு செயல்படும் ‘ஸ்கைடிரேக்ஸ்’ ஆய்வு நிறுவனம் பயணிகளிடம் நடத்திய கருத்தாய்வின் அடிப்படையில், 12வது முறையாக இந்த மகுடத்தை சாங்கி விமான நிலையத்திற்கு சூட்டியிருக்கிறது.
கொவிட்-19 கிருமிப் பரவலின்போது 2021, 2022ஆம் ஆண்டுகளில் இந்தச் சிறப்பை இழக்க நேரிட்டாலும் இப்போது மீண்டும் அதை எட்டியுள்ளது சாங்கி விமான நிலையம்.
மேலும், ஆசியாவின் ஆகச் சிறந்த விமான நிலையம், உலகின் ஆகச் சிறந்த கேளிக்கை நடவடிக்கைகள் கொண்ட விமான நிலையம், உலகின் ஆகச் சிறந்த உணவக வசதிகள் உள்ள விமான நிலையம் ஆகிய சிறப்புகளையும் இம்முறை சாங்கி விமான நிலையம் பெற்றுள்ளது.
ஆம்ஸ்டர்டாமில் நேற்று முன்தினம் நடைபெற்ற ‘2023 உலக விமான நிலைய விருது வழங்கும் விழாவில்’ இந்த விருதுகள் அறிவிக்கப்பட்டன.
உலகின் ஆகச் சிறந்த விமான நிலையங்கள் பட்டியலில் கத்தார் தலைநகர் தோஹாவில் உள்ள ஹமாத் அனைத்துலக விமான நிலையம் இரண்டாவது இடத்தையும் ஜப்பானியத் தலைநகர் தோக்கியோவில் உள்ள ஹனேடா விமான நிலையம் மூன்றாவது இடத்தையும் பிடித்துள்ளன.
முன்னதாக, 2013ஆம் ஆண்டு முதல் 2020ஆம் ஆண்டு வரை தொடர்ந்து எட்டு ஆண்டுகளாக, உலகின் ஆகச் சிறந்த விமான நிலையம் என்ற சிறப்பை சாங்கி பெற்றது. நீண்டகாலம் இதைத் தக்கவைத்துக்கொண்ட பெருமையும் சாங்கி விமான நிலையத்தைச் சாரும்.
கருத்தாய்வில் கலந்துகொண்ட பயணிகள், பாதுகாப்பு, குடிநுழைவு நடைமுறை, கடைகள் போன்றவற்றில் தாங்கள் பெற்ற அனுபவங்களின் அடிப்படையில் கருத்துரைத்தனர்.
படம்: ஸ்ட்ரெய்ட்ஸ் டைம்ஸ்