மாணவர் முரசு
இ-பேப்பர்
நிதி நெருக்கடியில் சிக்கியிருக்கும் கிரெடிட் சுவிஸ் வங்கியை யுபிஎஸ் வங்கி வாங்குவதால் சிங்கப்பூர் வங்கித் துறையின் நிலைத்தன்மை எந்தவிதத்திலும் பாதிக்காது.
கிரெடிட் சுவிஸ் வங்கி சிங்கப் பூரில் இடையூறு இல்லாமல் செயல்படும். வாடிக்கையாளர்கள் அவ்வங்கியில் உள்ள கணக்கு களைத் தொடர்ந்து பயன்படுத்தலாம் என்று சிங்கப்பூர் நாணய ஆணைம் நேற்று தெரிவித்தது.
கிரெடிட் சுவிஸ் வங்கியின் மற்ற துறைகளுடனான ஒப்பந்தங்கள் இன்னமும் நடைமுறையில் இருப்பதை சிங்கப்பூரின் மத்திய வங்கி சுட்டிக்காட்டி உள்ளது.
சுவிட்சர்லாந்தின் நிதித் துறையில் முக்கிய தூண்களாக விளங்கும் இரண்டு வங்கிகளும் சில்லறை வாடிக்கையாளர்களுக்கு சேவையாற்றுவதில்லை. தனியார் வங்கிகளாகும். சிங்கப்பூரில் முதலீட்டு நிறுவனங்களாகவும் அவ்விரு வங்கிகள் செயல்படுகின்றன.
வங்கி நடவடிக்கைகளைத் தவிர சிங்கப்பூரில் உரிமம் பெற்ற இதர நிதி நிறுவனங்களுடன் அது நிதி சேவைகளை வழங்குகிறது. இத்தகைய நிறுவனங்கள் தங்களுடைய உரிமங்களின்கீழ் தொடர்ந்து சிங்கப்பூரில் செயல்படும் என்று ஆணையம் விளக்கியது.
இருந்தாலும் சுவிஸ் நிதிச் சந்தை மேற்பார்வை ஆணையத்துடன் (ஃபின்மா) தொடர்ந்து தொடர்பில் இருப்பதாகவும் கிரெடிட் சுவிஸ் வங்கியைக் கையகப் படுத்துவது குறித்து திங்களன்று அந்த ஒழுங்குமுறை ஆணையம் தெரிவித்ததாகவும் சிங்கப்பூர் நாணய ஆணையம் கூறியது.
கையகப்படுத்துதல் அமலாக் கப்படும்போது சிங்கப்பூர் நாணய ஆணையம், ஃபின்மா, கிரெடிட் சுவிஸ், யுபிஎஸ் ஆகியவை வேலை வாய்ப்பு உள்ளிட்டவை பாதிக்காமல் முறையான மாற்றத்திற்கு ஏற்பாடு செய்யும்.
கிரெடிட் சுவிஸ் வங்கி, சிங்கப் பூரில் சுமார் 3,500 பேரை வேலையில் அமர்த்தியிருப்பதாக சந்தை நிலவரங்கள் மூலம் ஸ்ட்ரெய்ட்ஸ் டைம்ஸ் அறிகிறது.
2018 ஜூலையில் வெளியிட்ட ஓர் அறிக்கையில் அந்த எண்ணிக்கை 4,000ஆக இருக்கும் என்று பிசினஸ் டைம்ஸ் தெரிவித்திருந்தது.
இதற்கிடையே ஸ்ட்ரெய்ட்ஸ் டைம்சுக்குப் பதிலளித்த கிரெடிட் சுவிஸ் வங்கி, வாடிக்கையாளர் சேவையில் எந்தவித இடையூறையும் எதிர்பார்க்கவில்லை என்று அந்த வங்கி கூறியுள்ளது.
"சுமூகமான மாற்றத்தை உறுதி செய்வதில் நாங்கள் முழுகவனம் செலுத்தி வருகிறோம். ஹாங்காங்கில் இன்றும் நாளையும் நடைபெறவிருக்கும் எங்களுடைய முதலீட்டு மாநாடு திட்டமிட்டபடி நடக்கும். வாடிக்கையாளர்களுக்கு சேவையாற்றும் எங்களுடைய நோக்கத்தில் மாற்றமிருக்காது," என்று கிரெடிட் சுவிஸ் வங்கி மேலும் கூறியது.
நீண்டகாலமாக போட்டியாக விளங்கிய கிரெடிட் சுவிஸ் வங்கியை யுபிஎஸ் வாங்கவிருப்பதாக ஃபின்மா அறிவித்ததைத் தொடர்ந்து சிங்கப்பூர் நாணய ஆணையத்தின் அறிக்கை வெளியாகியுள்ளது.