மாணவர் முரசு
இ-பேப்பர்
சிங்கப்பூரில் வாகனமோட்டும் உரிமம் பெற விரும்புவோர் சாலைகளில் பயிற்சி செய்யத் தொடங்குவதற்குமுன் போக்குவரத்து விதிமுறைகள் தொடர்பான எழுத்துத் தேர்வில் தேர்ச்சி பெறுவது கட்டாயம்.
சிங்கப்பூர் போக்குவரத்துக் காவல்துறை நடத்தும் இத்தேர்வுக்கான பயிற்சியை இணையத்தில் இனி எளிதாக மேற்கொள்ளலாம். இன்று முதல் இத்தகைய பயிற்சித் தேர்வுகளை போக்குவரத்துக் காவல்துறை இணையத்தில் வெளியிடுகிறது.
சிங்பாஸ் கணக்கு வைத்திருப்போர் இதனை இலவசமாகப் பயன்படுத்தலாம். சிங்கப்பூரர்கள், நிரந்தரவாசிகள், 'ஃபின்' எனப்படும் வெளிநாட்டினர் அடையாள எண் வைத்திருப்போர் ஆகியோர் சிங்பாஸ் கணக்குகளுக்கு விண்ணப்பிக்கலாம்.
இணையத்தில் இந்தப் பயிற்சித் தேர்வை ஆங்கிலம், மாண்டரின், மலாய், தமிழ் ஆகிய நான்கு மொழிகளில் எழுத இயலும்.
சிங்கப்பூர் காவல்படை இணையத்தளத்தின் மின்னிலக்கச் சேவைகள் பக்கத்திலும் போக்குவரத்துக் காவல்துறையின் கற்றல் இணையவாசலிலும் இந்தத் தேர்வை எழுதலாம்.
பயிற்சித் தேர்வு எழுதுவோர் 50 நிமிடங்களில் 50 கேள்விகளுக்குப் பதிலளிக்கும் வண்ணம் நேர அடிப்படையிலான தேர்வை எழுதிப் பழகலாம்.
ஒவ்வொரு கேள்விக்கும் கொடுக்கப்பட்டிருக்கும் பதில்களில் ஒன்றைத் தேர்ந்தெடுக்க வேண்டும்.
தேர்வு நேரம் முடிவதற்கு 10 நிமிடங்கள் இருக்கும்போது நினைவூட்டும் அம்சமும் உண்டு.
பயிற்சித் தேர்வை மறுஆய்வு செய்யவும் தாங்கள் தவறாக விடையளித்த கேள்விகளுக்கு உரிய சரியான பதில்களை அறிந்துகொள்ளவும் தேர்வு எழுதுவோர் அனுமதிக்கப்படுவர்.
இத்தேர்வுகளை ஒருவர் எத்தனை முறை வேண்டுமானாலும் எழுதிப் பயிற்சி பெறலாம்.
வாகனமோட்டுவதற்கான அடிப்படை எழுத்துத் தேர்வு, இறுதித் தேர்வு, மோட்டார் சைக்கிள் ஓட்டுவதற்கான எழுத்துத் தேர்வு ஆகியவற்றில் தேர்ச்சிபெற ஒருவர் குறைந்தது 45 கேள்விகளுக்கு சரியான பதில் அளிக்க வேண்டும்.