மாணவர் முரசு
இ-பேப்பர்
2023 எஃப்1 கார் பந்தயத்துக்கான ஆகப் பிரத்தியேக நுழைவுச்சீட்டுகளின் விலை, 2008க்குப் பிறகு முதன்முறையாக ஐந்து இலக்க எண்ணை எட்டியுள்ளது. மூன்று நாள் 'பெடோக் கிளப்' நுழைவுச்சீட்டுகள், இவ்வாண்டு $11,016க்கு விலைபோயின. கடந்த ஆண்டின் விலையைவிட ($9,898) இது 10 விழுக்காட்டிற்குமேல் அதிகம். 2019ல் இந்த நுழைவுச்சீட்டுகளின் விலை $9,500ஆக இருந்தது.
கொவிட்-19 பெருந்தொற்று காரணமாக 2020லும் 2021லும் எஃப்1 நடைபெறவில்லை.
விலை உயர்ந்தபோதிலும், இந்த மூன்று நாள் நுழைவுச்சீட்டுகள் அனைத்தும் விற்றுத் தீர்ந்துவிட்டதாக எஃப்1 ஏற்பாட்டாளர் சிங்கப்பூர் ஜிபி தெரிவித்தது. வெள்ளிக்கிழமை, சனிக்கிழமைக்கான ஒருநாள் நுழைவுச்சீட்டுகள் மட்டும் குறிப்பிட்ட எண்ணிக்கையில் இருப்பதாக அது கூறியது.
இதற்கிடையே, சில பிரிவுகளில் நுழைவுச்சீட்டு விலையில் மாற்றம் செய்யப்பட்டுள்ளன. ஐந்து நுழைவுச்சீட்டுப் பிரிவுகளில் விலை 20 விழுக்காடு வரை குறைந்துள்ளது. பதினேழு பிரிவுகளில் விலை கடந்த ஆண்டில் இருந்ததைப்போல உள்ளது. கடந்த ஆண்டின் எஃப்1 பந்தயம் 302,000 பார்வையாளர்களை ஈர்த்து புதிய சாதனை படைத்தது. ஒப்புநோக்க, 2008ல் நடைபெற்ற முதல் இரவுநேர பந்தயம் 300,000 பேரை ஈர்த்தது.