மாணவர் முரசு
இ-பேப்பர்
நிதித் துறையில் இன்னும் அதிகமான தொழில் பயிற்சித் திட்டங்கள் பலதுறைத் தொழிற்கல்லூரி மாணவர்களுக்கு வழங்கப்படும். அந்தத் திட்டத்தில் பங்கு பெறுவோர் சிங்கப்பூர் நாணய ஆணையம் நேற்று தொடங்கிய $8 மில்லியன் மதிப்பிலான மூன்று ஆண்டு மானியத்தைப் பெறுவார்கள்.
வங்கிகள், காப்புறுதி நிறுவனங்கள் போன்ற நிதிக் கழகங்கள் நிதித் திட்டத்துக்கான பலதுறைத் தொழிற்கல்லூரித் திறனாளர்களைத் தேர்வு செய்யலாம்.
பலதுறைத் தொழிற்கல்லூரி பட்டதாரிகளுக்கும் மாணவர்களுக்கும் வேலை அனுபவப் பயிற்சி அளித்தல், தொழில் பயிற்சி அளித்தல், ஏட்டுக்கல்வி உபகாரச் சம்பளங்கள் வழங்குதல் ஆகியவற்றுக்கு ஆகும் செலவை இந்த நிதித் திட்டம் மூலம் ஈடுசெய்துகொள்ளலாம்.
இந்தத் திட்டத்துக்கு சிங்கப்பூர் நாணய ஆணையத்தின் நிதித் துறை மேம்பாட்டு நிதி ஆதரவளிக்கிறது. அந்த நிதியை வங்கி, நிதித்துறைக் கழகம் நிர்வகிக்கும்.
"உங்களில் பலர் தொழில்நுட்ப ரீதியில் திறமைசாலிகளாகவும் பிரச்சினைகளை நன்கு தீர்ப்பவர்களாகவும் உள்ளனர். கட்டொழுங்கு மிக்க சூழ்நிலைகளில் சிறப்பாக வேலை செய்யக்கூடிய ஆற்றல் உள்ளவர்களாக இருக்கின்றனர். இப்படிப்பட்டவர்களை உருவாக்கும் பலதுறைத் தொழில்கல்லூரிகளுக்கு நன்றி கூறக் கடமைப்பட்டிருக்கிறோம்," என்றார் வர்த்தக, தொழில் துணை அமைச்சர் ஆல்வின் டான்.
'நிதித் துறையில் இளம் திறனாளர்களுக்கான அதிகமான பாதைகள்' எனும் நிகழ்ச்சியில் பலதுறைத் தொழிற்கல்லூரி மாணவர்களிடையே பேசுகையில் திரு டான் இந்த விவரங்களை வெளியிட்டார்.
நிதித் துறையில் பலதுறைத் தொழிற்கல்லூரி மாணவர்களின் பிரிதிநிதித்துவம் குறைவாக உள்ளது என்று கூறிய அமைச்சர், அவர்களில் மூன்று விழுக்காட்டினர்தான், பட்டம் பெற்ற பிறகு நிதித் துறையில் முழுநேர, நிரந்தர வேலையில் சேர்கிறார்கள் என்றார்.
சிங்கப்பூர் பொருளியலுக்கு உதவும் அனைத்து வேலைகளிலும் ஐந்து விழுக்காடு நிதித் துறை வேலைகளைப் பிரதிநிதிக்கிறது என்பதையும் திரு டான் சுட்டினார்.
பலதுறைத் தொழிற்கல்லூரித் திறனாளர்கள் நிதித் திட்டத்தில் மூன்று பாதைகள் உள்ளன.
முதல் பாதையில், திட்டத்தில் பங்கேற்போருக்கு 80% வேலை அனுபவப் பயிற்சி உதவித் தொகையாக $1,000 வரை 12 மாதங்களுக்குக் கிடைக்கும்.
இரண்டாவது பாதையில், தொழில் பயிற்சி பெறுவோருக்குக் கூடுதல் ஆதரவாக 12 மாதங்களுக்கு, நிதியாதரவு கிடைக்கும். அவர்கள் பல்கலைக்கழக மாணவர்களுக்கு ஈடாக நிதி உதவி பெறுவார்கள்.
மூன்றாவது பாதையில், சிங்கப்பூர் நாணய ஆணையம் ஒவ்வொரு மாணவரின் கல்விக் கட்டணத்திலும் பாதியை, அதாவது $10,000 வரை நிதி ஆதரவு அளிக்கும்.
அந்த மாணவர்கள் பட்டயக் கல்விக்குப் பிந்திய நிதித் துறை சார்ந்த கல்வி அல்லது பல்கலைக்கழகத்தில் பட்டக்கல்வி பயில நிதிக் கழக முதலாளிகளின் உபகாரச் சம்பளங்களைப் பெறுவார்கள்.