மாணவர் முரசு
இ-பேப்பர்
சிங்கப்பூரின் உற்பத்தித் துறை, தொடர்ந்து 6வது மாதமாக மார்ச் மாதத்திலும் சரிவைச் சந்தித்து மோசமான நிலையை அடைந்து உள்ளது.
பொருளியல் மேம்பாட்டுக் கழகம் நேற்று வெளியிட்ட தரவுகள் இதனைக் காட்டுகின்றன.
ஆண்டு அடிப்படையில் மார்ச் மாதத்தில் தொழிற்சாலை உற்பத்தி 4.2 விழுக்காடு வீழ்ச்சி அடைந்தது. பிப்ரவரியில் இந்த வீழ்ச்சி 8.9 விழுக்காடாக இருந்தது. உயிர்மருத்துவ துறையை தவிர்த்துப் பார்த்தால் மற்ற உற்பத்தி ஆறு விழுக்காடு குறைந்தது.
மூன்று மாத சராசரியை அடிப்படையாகக் கொண்டால் கடந்த ஆண்டைவிட மார்ச் மாதத்தில் உற்பத்தி 5.6 விழுக்காடு சரிந்தது.
ஆண்டு அடிப்படையில் மார்ச்மாதத்தில் போக்குவரத்து பொறியியல் துறையின் உற்பத்தி மட்டும் ஆகப்பெரிய அளவில் 23.5 விழுக்காடு கூடியது.
கடல் மற்றும் கடல்சார்ந்த பொறியியல் பிரிவு 48.4 விழுக்காடு கூடியுள்ளது.
கப்பல்துறையின் நடவடிக்கைகள் அதிகரித்ததே இதற்கு காரணம். எண்ணெய், எரிவாயு சாதனங்களின் உற்பத்தி கூடியதும் மற்றொரு காரணமாகும்.
இதற்கு அடுத்ததாக உயிர் மருத்துவ துறையின் உற்பத்தி ஆண்டு அடிப்படையில் ஏழு விழுக்காடு வளர்ச்சி கண்டது.
மருத்துவ சாதனங்களுக்கான ஏற்றுமதி தேவை அதிகரித்ததால் மருத்துவ தொழில்நுட்ப உற்பத்தி 18 விழுக்காடு கூடியது. மாறாக, மருந்துத் துறை ஒரு விழுக்காடு குறைந்தது.
ரசாயனத் துறை மட்டும் ஆக அதிக சரிவைச் சந்தித்தது. ஆண்டு அடிப்படையில் அத்துறை மார்ச் மாதத்தில் 11.8 விழுக்காடு வீழ்ச்சியடைந்தது.
விமானப் போக்குவரத்து தொடர்ந்து கூடியதால் விமானங் களுக்கான எரிபொருள் தேவையும் அதிகரித்து பெட்ரோலியத் துறை 12.5 விழுக்காடு வளர்ச்சி அடைந்தது.