மாணவர் முரசு
இ-பேப்பர்
கருணாநிதி துர்கா
சிங்கப்பூரின் பலதுறைத் தொழிற்கல்லூரிகளில் இம்மாதம் பட்டமளிப்பு விழா நடைபெற்று வரும் வேளையில், தங்களின் கல்விப் பயணத்தைப் பற்றியும் தாங்கள் அடைய விரும்பும் இலக்குகள் பற்றியும் இளையர்கள் சிலர் தமிழ் முரசுடன் பகிர்ந்துகொண்டார்கள்.
ஆரம்பகாலக் கல்வியுடன் கூடிய தமிழ்ப் பட்டயப் படிப்பை மேற்கொண்ட இம்மானுவேல் சுவிஹேஷ் சத்திய சீலன், 21, சிறார்களிடையே தமிழ்மொழி மீதான ஆர்வத்தை ஏற்படுத்துவதில் பெருமகிழ்ச்சி கொள்கிறார். இதற்குப்பின் தமிழ் மொழி, இலக்கியத்தில் இளங்கலைப் பட்டக்கல்வியை மேற்கொள்ள விரும்புகிறார் இம்மானுவேல்.
ஆரம்பக்கல்வித் துறையில் பெண்களே அதிகமாக இருப்பதால் ஆரம்பத்தில் இத்துறைக்கு வருவதில் தயங்கினார் இவர்.
பின், பாலினம் தனது இலக்கிலிருந்து பின்வாங்குவதற்கு ஒரு காரணமாக இருக்கக்கூடாது என்பதை உணர்ந்தார்.
'மை வோர்ல்டு' குழந்தைப் பராமரிப்பு நிலையத்தில் பயிற்சி மேற்கொண்டதில் பல சவால்களை அவர் எதிர்கொண்ட இவர், அவற்றைப் படிப்பினைகளாகக் கருதித் தனது திறன் மேம்பாட்டில் கவனம் செலுத்தினார். இவர் சிறார்களுக்காக நடத்திய முதல் வகுப்பிலேயே அவர்களின் கவனத்தைத் தன்வசப்படுத்தியதுடன் பாடத்தின் நோக்கங்களையும் நிறைவுசெய்தார்.
"என் பெற்றோர் எனக்குப் பெரும் ஆதரவாக இருந்தனர். என் விருப்பம்போல் படிப்பதில் முழு சுதந்திரம் அளித்தனர்," என்று இம்மானுவேல் கூறினார்.
தாதிமைத் துறையில் பட்டயக்கல்வி பயின்ற ஷால்ணீ செல்வராஜூ, 24, சிறு வயதில்இருந்தே மருத்துவம் தொடர்பான அனைத்தையும் பார்த்து வியந்தார்.
தாதிமைத் துறையில் ஒரு மேலாளராக எதிர்காலத்தில் பணிபுரிய விரும்பும் இவர், அத்துறையில் இளநிலைப் பட்டக்கல்வி மேற்கொள்ளவிருக்கிறார்.
பலதுறைத் தொழிற்கல்லூரியில் பயிலும் அதே காலகட்டத்தில் பகுதிநேர வேலையாக இல்லம் சார்ந்த தாதிமைப் பராமரிப்பு சேவைகளைப் புரிந்துவந்தார் ஷால்ணீ.
சமூகத்திற்குத் தனது பங்கை ஆற்ற வேண்டும் என்ற நோக்கத்துடன் இந்து இளையர்க் கட்டமைப்புக்குழுவுடனும் 'ட்ரைஜன்' தொண்டூழியராகவும் சேவையாற்றி வருகிறார் இவர்.
"எனது தொண்டூழியப் பயணத்தில் நாட்பட்ட நோயால் பாதிக்கப்பட்ட சிலரைச் சந்தித்தேன். அவர்களது நோயை எவ்வாறு கையாளலாம் என்பதைப் பற்றிய அறிவுரைகளை நான் வழங்குவதுடன் சுகாதாரம் தொடர்பான செயலிகளைப் பயன்படுத்தக் கற்றுக்கொடுப்பதும் உண்டு," என்றார் ஷால்ணீ.
தொழில்நுட்பக் கல்விக்கழகத்தில் பயின்று பட்டயக்கல்வி பெற்று மேலும் பட்டக்கல்வி மேற்கொள்ளவிருக்கும் இவருக்குப், பெற்றோரும் நண்பர்களும் ஆசிரியர்களும் உறுதுணையாக இருந்தனர்.
தெமாசெக் பலதுறைத் தொழிற்கல்லூரியில் இணையப்பாதுகாப்பு மற்றும் மின்னிலக்கத் தடயவியல் பட்டயக்கல்வியை பயின்ற அஹமது ராஷீம் முஹம்மது ஜமீல், 20, இணையப்பாதுகாப்புச் சேவைகளை அனைவருக்கும் கொண்டு சேர்க்க வேண்டும் என நோக்கம் கொண்டுள்ளார்.
சிறுவயதில் தொழில்நுட்பம் மீது ஆர்வம் கொண்டு பள்ளிப் பருவத்தில் தொழில்நுட்பம் சார்ந்த போட்டிகளில் கலந்துகொண்டு வெற்றியும் பெற்ற இவருக்கு, தொழில்நுட்பம் மீதான ஆர்வம் கூடிக்கொண்டே போனது.
தொழில்நுட்பத்தின் ஆபத்தான மறுபக்கத்தையும் உணர்ந்து இணையப்பாதுகாப்பைப் பற்றி தெரிந்துகொள்ள வேண்டும் என விரும்பினார் ராஷீம். முழு 4.0 ஜிபிஏ புள்ளிகள் பெற வேண்டும் என்ற இலக்கை எட்டியதில் தான் பெரும் மகிழ்ச்சி அடைந்ததாகவும் கூறினார் ராஷீம்.