மாணவர் முரசு
இ-பேப்பர்
சிங்கப்பூருக்கும் சீனாவின் ஷங்காய் நகருக்கும் இடைப்பட்ட ஒத்துழைப்பு, இந்த இரு நாட்டுக்கும் இடையில் புதிய புத்தாக்கத் திட்டங்கள் இடம்பெறுவதற்கு ஊக்குவிப்பாகத் திகழ முடியும் என்று துணைப் பிரதமர் லாரன்ஸ் வோங் டுவிட்டரில் தெரிவித்துள்ளார்.
சீனாவுக்கு ஐந்து நாள் அதிகாரபூர்வ பயணம் மேற்கொண்டு இருக்கும் திரு வோங், நேற்று ஷங்காய் கம்யூனிஸ்ட் கட்சி செயலாளர் சென் ஜினிங்கை சந்தித்தார்.
அவருடன் நல்ல முறையில் பேச்சுவார்த்தை நடத்தியதாக திரு வோங் தெரிவித்துள்ளார்.
அதற்குப் பிறகு அவர் இந்தக் கருத்தைத் தெரிவித்தார்.
முன்னதாக திரு வோங், ஷங்காய் நகரில் செயல்படும் நியோ ஹவுஸ் என்ற மின்சார வாகன தயாரிப்புத் தொழிற்சாலையைப் பார்வையிட்டார்.
அந்த நிறுவனம் சிங்கப்பூரில் ஆய்வு உருவாக்க நிலையம் ஒன்றை அமைக்கிறது.
விவேகமிக்க மின்சார சாதனங்களை உருவாக்கவும் தானியக்க வாகன தொழில்நுட்பங்களை உருவாக்கவும் சிங்கப்பூரில் அமையக்கூடிய நிலையம் ஆராயும் என்று திரு வோங் தெரிவித்தார்.
நியோ ஆலையில் அடுத்த தலைமுறை மின்கலன் தொழில்நுட்பத்தை திரு வோங் பார்வையிட்டார்.
நியோ நிறுவனத்தின் நிறுவனரும் தலைவரும் தலைமை அதிகாரியுமான வில்லியம் லியை திரு வோங் சந்தித்தார். அதைக் காட்டும் படங்களை டுவிட்டரில் திரு வோங் வெளியிட்டார்.
ஷங்காய் நகரில் வசிக்கும் சிங்கப்பூரர்கள் ஞாயிற்றுக்கிழமை துணைப் பிரதமரைச் சந்தித்தனர்.
ஷங்காயில் வசிக்கும் சுமார் 350 சிங்கப்பூரர்கள், அந்தச் சந்திப்பில் கலந்துரையாடி மகிழ்ந்தனர். சிங்கப்பூரின் துணைப் பிரதமர் என்ற முறையில் திரு வோங் சீனாவுக்கு முதன்முதலாக இப்போது பயணம் மேற்கொண்டு இருக்கிறார்.
துணைப் பிரதமருடன் மூத்த துணை அமைச்சர்களும் துணை அமைச்சரும் அதிகாரிகளும் சென்று இருக்கிறார்கள்.
நிதி அமைச்சருமான திரு வோங் இதற்கு முன்னதாக 2018ல் சீனாவுக்குச் சென்றார்.
சிங்கப்பூரின் அடுத்த பிரதமராக தேர்ந்தெடுக்கப்பட்ட பிறகு திரு வோங் மலேசியா, இந்தியா, புருணை, இந்தோனீசியா நாடுகளுக்குச் சென்று தனிப்பட்ட முறையில் அந்நாடுகளுடன் தொடர்புகளைப் பலப்படுத்தி வருகிறார்.
தமது ஐந்து நாள் சீனப் பயணத்தின்போது திரு வோங் பெய்ஜிங் நகருக்கும் செல்கிறார்.
பிரதமர் லீ சியன் லூங் கடந்த மார்ச் மாதம் சீனா சென்றிருந்தார். அந்தப் பயணத்தின்போது அவர் சீனப் பிரதமர் லி சியாங்கை சந்தித்தார். இரு தரப்பு உறவுகள் புதிய உச்சத்தைத் தொடும் இரு தலைவர்களும் அப்போது அறிவித்தனர்.
பிரதமரின் பயணத்தைத் தொடர்ந்து இப்போது துணைப் பிரதமரின் சீனப் பயணம் இடம்பெற்று இருக்கிறது. இந்தப் பயணம் சீனாவின் புதிய தலைமைத்துவத்துடன் உறவுகளைத் ஏற்படுத்திக்கொள்ள திரு வோங்கிற்கு வாய்ப்பளிக்கும்.