மாணவர் முரசு
இ-பேப்பர்
சிங்கப்பூரின் முக்கிய ஏற்றுமதி ஆண்டு அடிப்படையில் தொடர்ந்து ஏழாவது மாதமாக ஏப்ரலில் சரிவைக் கண்டுள்ளது. ஆண்டு அடிப்படையில் மார்ச்சில் 8.3 விழுக்காடு சரிவு கண்ட எண்ணெய் சாராத உள்நாட்டு ஏற்றுமதி, ஏப்ரலில் 9.8 விழுக்காடு சரிந்தது என்று என்று எண்டர்பிரைஸ் சிங்கப்பூர் நேற்று வெளியிட்ட புள்ளிவிவரங்கள் காட்டின.
ஆண்டின் இரண்டாம் பாதியில் முன்னேற்றம் ஏற்படுவதற்கு முன்னர் இன்னும் சில மாதங்கள் சரிவைக் காணும் என்று பொருளியலாளர்கள் கணித்துள்ளனர்.
ராய்ட்டர்ஸ் கருத்துக்கணிப்பில் பொருளியல் வல்லுநர்கள் கணித்த 9.4% சுருக்கம், புளூம்பெர்க் கருத்துக் கணிப்பு காட்டிய 9.6% வீழ்ச்சியைவிட இது சற்று மோசம்.
மின்னணு ஏற்றுமதி ஆண்டு அடிப்படையில், மார்ச் மாத 22.3% சரிவைத் தொடர்ந்து ஏப்ரலில் 23.3% குறைந்தது. ஒருங்கிணைந்த மின்சுற்று (ஐசி), தனிப்பயன்பாடு கணினிகள், டிஸ்க் மீடியா பொருள்களின் ஏற்றுமதி முறையே 21%, 50.3%, 41.6% சுருங்கியது.
மார்ச் மாத 4.7% விழுக்காடு சரிவைத் தொடர்ந்து, மின்னியல் தவிர்த்த எண்ணெய் சாரா பொருள்களின் ஏற்றுமதி ஏப்ரலில் 5.8% குறைந்தது. பெட்ரோலிய வேதிப்பொருள், முதன்மை வேதிப்பொருள்கள், உணவு தயாரிப்புகளில் ஏற்பட்ட சுருக்கத்தால் இந்த வீழ்ச்சி ஏற்பட்டது.
மின்னியல் பொருள்கள் ஏற்று மதியால் தொடர்ந்து ஒன்பது மாதங்கள் சரிவு ஏற்பட்டது ஒரு முக்கியக் கவலையாக இருந்தது.
மாதாந்திர அடிப்படையில், மருந்து ஏற்றுமதி அதிகரித்தனால் எண்ணெய் சாரா ஏற்றுமதி 2.7 விழுக்காடு உயர்ந்து $16.1 பில்லியனாக இருந்தது.
இதற்கிடையே, ஏப்ரல் மாதத்துக்கான ஒட்டுமொத்த வர்த்தகம் சரிந்தது. 2022ஆம் ஆண்டின் ஏப்ரல் மாதத்துடன் ஒப்பிட சென்ற ஏப்ரல் மாதத்தில் மொத்த வர்த்தகம் 18.8% குறைந்துள்ளது. இது மார்ச்சில் 8.6% குறைந்தது.
ஆசியான் உட்பட சிங்கப்பூரின் முதல் 10 சந்தைகளில் ஏழுக்கான உள்நாட்டு எண்ணெய் சாரா பொருள்கள் ஏற்றுமதி ஏப்ரலில் இரட்டை இலக்கச் சுருக்கத்தைக் கண்டது.
எனினும், அமெரிக்கா, தென் கொரியா, ஐரோப்பிய ஒன்றியம் ஆகியவற்றுக்கான ஏற்றுமதி முறையே 40.7%, 38.9%, 4.3% அதிகரித்தது.
ஏப்ரல் மாதத்தில் சீனாவுக்கான பெட்ரோலிய வேதிப்பொருள் மருந்துகள், ஒருங்கிணைந்த மின்சுற்றுகள் ஆகியவற்றின் ஏற்றுமதி குறைந்ததால், அந்நாட்டுக்கான எண்ணெய் சாரா ஏற்றுமதி 20.9% சுருங்கியது. அதேபோல் மலேசியாவுக்கான ஏற்றுமதி 35 விழுக்காடும், தைவானுக்கான ஏற்றுமதி 27.5 விழுக்காடும் குறைந்தன.
இந்தோனீசியா, தைவான், தென்கொரியா ஆகிய இடங்களின் கீழிறங்கும் வர்த்தக தரவு களைப் பார்க்கையில் வர்த்தகம் சார்ந்த சிங்கப்பூரின் பொருளியல் ஆபத்தை எதிர்நோக்குவதாக கணிப்பாளர்கள் கருதுகின்றனர்.